Den un conferencia di prensa ayera tardi, ex-politico Otmar Oduber a yama trece dilanti un update di e caso penal Flamingo, sigurando cu te ainda e acusacionnan den su contra no tin base.

E motibo di e di tres conferencia di Oduber pa e aña aki, segun el a sigura, ta debi cu for di aña 2019 cu e caso aki a cuminsa tin un investigacion y acusacion andando “cu ta manchando mi nomber.” El a yama un conferencia di prensa pa defende su honor y su nomber, debi cu e ta sinti cu su persona a wordo viola pa Ministerio Publico.

Su abogado Vito Carlo a expresa cu Oduber como un sospechoso den caso aki, su persona tin e derecho si investigacion ta tardando of si e ta haya cu Ministerio Publico ta drumi, e tin derecho di bay corte pa pidi hues comisario pa termina e investigacion of duna un fecha final pa Ministerio Publico tuma un decision.

Na november di aña pasa, hues comisario no a bay di acuerdo cu e peticion aki y cu e investigacion te ainda ta andando y cu januari di e aña aki e dossier mester tabata cla pa tuma un decision den e caso, segun Ministerio Publico a informa nan.

Te na e momentonan aki nan ta wardando un decision di hues comisario si ta bay duna un fecha final pa e caso of no, “mi ta haya hopi straño, normalmente Ministerio Publico tin un sospecho, nan ta investiga y nan ta persigui bao e sospecho, awor aki ta parce tin un investigacion pa purba saca un sospecho y a base di esey ta bay pidi pa bay persigui, di e sospecho cu tabatin na comienso, nada a sali afo, e flamingo mes no tin nada, nada di dje,” Carlo a señala.

Esey ta e parti legal cu Carlo a splica cu nan ta bezig cune na e momentonan aki pa purba di obliga Ministerio Publico pa tuma un decision y “pa no laga Otmar Oduber mas den insiguridad cu e ta aworaki.”

Oduber tambe a sigura cu nan a bay riba un investigacion “pero nan no a haya nada, mi ta imagina mi cu nan ta bergonsa aworaki, pasobra ta placa di pueblo, ta cantidad di Hulandes a bin, RST, tur hende ta envolvi, nan ta kere nan ta gara otro politico, un otro minister mas, pasobra esey ta e meta, pa mancha Aruba y mancha riba politiconan, pero ora nan a realisa cu no tin nada, nan a bay colga riba un denuncia falso cu Marisol Lopez-Tromp a haci dos luna despues cu nan bay haci inval na mi cas.”

Igualmente, el a declara cu Ministerio Publico a confirma na nan cu e rapport ta cla, e investigacion a keda cera pero casi cuatro luna a pasa y te ainda nan no a tende nada mas.

E ta puntra si tin caso contra Marisol Lopez-Tromp of no, pa motibo cu el a bisa cu el a gaña y cu den DIP si tin cosnan cu tin cu papia riba dje.

El a bisa tambe cu el a pidi audiencia cu fiscal di Ministerio Publico pero tampoco no a haya contesta, e persona cu a cuminsa cu e caso mes ta un persona anonimo na unda su acusacionnan te awor no tin base y cu aworaki no tin otro acusacion sino solamente esun di Lopez-Tromp.

Pa finalisa, el a caba e conferencia di prensa sigurando cu “e cos ‘ki mester caba y si mi mester bin back den ring, mi ta bay back den ring, pero nos ta bin cu un glove bisti e biaha aki.”