Ayera mainta ex-minister y politico Otmar Oduber a tene un conferencia di prensa dilanti Ministerio Publico (OM), na unda el a entrega un keho adicional relaciona cu e ocho acusacionnan inicial cu tabata e motibo pakico a cuminsa cu e investigacion di caso Flamingo den su contra.

Oduber a splica cu manera ta conoci el a entama un caso contra OM, y e caso aki a tuma luga den corte, caminda cu el a bay HOF pa pidi, a base di negacion cu tabatin di OM, pa cuminsa un investigacion contra tres funcionario; un ta e hefe encarga cu Departamento di BCI den Cuerpo Policial di Aruba, otro ta un miembro di Landsrecherche y e ultimo ta un miembro di RST.

El a recorda cu caso Flamingo a cuminsa mas cu cuater aña pasa a base di e ocho procesonan verbal aki cu a wordo traha door di e funcionarionan aki y segun Oduber ta indica, den corte a keda confirma cu ni un di e ocho procesonan aki ta e base mas pa loke ta e investigacion di caso Flamingo.

“Tur a wordo a wordo bari for di mesa, no ta cuestion cu un parti di un di nan ta den dje ainda, 100% di tur e ocho procesonan verbal aki a wordo elimina y pa tal motibo ta un muestra bon cla cu ta imposible pa nos por tin confiansa den un sistema hudicial aki na Aruba y muy particularmente Ministerio Publico cu bo ta spera cu nan ta haci nan trabao den un forma imparcial y husto, y ora bo mira cu henter un caso a cuminsa riba ocho acusacion di cual niun no a resta, anto e ora algo ta fundamentalmente robes,” el a remarca.

Oduber a splica cu den e caso cu el a lanta conforme articulo 15 di e proceduranan cu tin den ley, el a exigi pa cuminsa un investigacion contra e funcionarionan cu a traha e procesonan verbal aki, cu el a señala ta claramente falso.

E ex minister y politico ta acusa nan y ta convenci cu perhurio ta tuma luga y falsificacion ta tuma luga, of, el a agrega, simplemente nan a haci esaki pa un persecucion politico, pa perhudica un politico activo cu tabatin na e momentonan ey.

El a sigui splica cu e motibo pakico el a entrega e keho adicional aki ayera mainta ta pasobra den corte Ministerio Publico a bisa, ariba tur e defensa di Oduber pa loke ta trata su exigencia pa cuminsa cu un investigacion di parti di landsrecherche di e sistema hudicial di OM riba e tres funcionarionan en cuestion, ta pasobra e ta haya cu procesonan verbal ta falso y OM su argumento tabata cu nan a haya informacion di un informante y funcionarionan como oficial di rapport nan unico tarea ta pa sigura cu e informacion cu nan ta haya for di e informante ta confiable.

Pero, el a agrega, e funcionarionan, segun AG a indica den corte, no ta esnan cu ta encarga cu verificacion di e informacion.

“Algo totalmente inaceptabel pa mi. Nos no a haya resultado ainda di hues pa scucha pakico Ministerio Publico no kier persigui su coleganan y awe mi a entrega un keho adicional na e keho cu tin contra e oficialnan di rapport aki di e sistema hudicial conforme nos articulo 2, pa loke ta difamacion y molester contra tur e informantenan cu a duna informacion na e tres funcionarionan aki cu a traha e ocho proces verbal,” Oduber a subraya.

El a resalta cu diamars ultimo den corte AG y OM “kier laba man di e tres funcionarionan bisando cu nan responsabilidad ta unicamente di verbalisa loke un informante a duna”, pero el a enfatisa cu nan responsabilidad tabata tambe pa percura cu e informante ta un informante cu ta di berdad confiabel.

Esey, el a señala, ta loke a cuminsa e caso aki y pa e motibo ey ayera el a entrega e keho adicional pa asina investiga e informante. El a agrega cu OM a indica den corte cu e informantenan ta confiable y pues esey ta indica cu OM sa ken e informantenan ta y esey a conduci na e entrega di e keho adicional.

“Mi kier scucha Ministerio Publico awe bisa mi cu no tin motibo pa persigui e informantenan aki si den corte e propio AG a bisa cu esnan cu ta skirbi e rapport no ta responsable pa check e informacion y door di esey nan no ta para responsable pa e informacion. Wel e ora nos ta bay patras di esunnan cu a informa pa nos haya sa ken ta esunnan cu a bay haci denuncianan falso cu awe tin mi cuater aña bao un investigacion pa cual a cambia henter e ruta di caso Flamingo,” el a remarca.

Oduber ta en espera ainda di decision di dos y den dos siman e tin cu haya un respuesta pa wak si hues ta forsa Ministerio Publico pa cuminsa investigacion ariba e funcionarionan en cuestion y aworaki, e kier haya un contesta tambe ariba keho nobo aki pa wak ken e informantenan aki ta. Ademas di esaki, el a agrega, el a entrega un caso di daño y perhuicio grandi y di difamacion.

Pa loke ta trata caso Flamingo, mirando cu tur ocho acusacion inicial a wordo elimina, Oduber ta cuestiona kico ta e intencion di Ministerio Publico si henter e base riba cual PG cuater aña pasa a duna autorisacion pa cuminsa un investigacion, a cambia totalmente.