Ayera mainta den un conferencia di prensa yama pa ex-politico Sr. Otmar Oduber, el a confirma cu su persona a entama un caso contra Ministerio Publico, RST y KPA. Esaki tin di haci cu e investigacion di caso ‘Flamingo’, cu segun el a informa a termina, pero te ainda Ministerio Publico no por duna Oduber un contesta si e caso ta sigui of no.

Diaranson ultimo, 19 di april, Oduber a presenta na Landsrecherche pa asina entrega un denuncia contra Ministerio Publico. El a informa cu dialuna 24 di april su persona, hunto cu su abogado, ta entama un caso contra Ministerio Publico pa un articulo cu tin den Ley pa purba forsa pa Ministerio Publico, den e caso aki PG, tuma un decision.

“Ya caba nos ta considera cu ta hopi tempo,” el a expresa. El a recorda cu na november aña pasa el a bay corte pa purba forsa pa e investigacion caba. Un dia prome cu e caso, Ministerio Publico a bisa cu den e di dos siman di januari ta bay keda cla cu e investigacion. Hues a considera esaki y a bisa cu e termino den ley ta papia di dos luna y pa e mesun dos luna ey hues no lo duna un veredicto den e caso ey.

Oduber a sigui splica cu mientras tanto januari a pasa y segun e por a compronde e investigacion a termina na maart y aworaki mas cu un luna atrobe a pasa y e no ta scucha nada tocante un decision di parti di Ministerio Publico.

“Manera mi a bisa na diferente ocasion, ta yega un punto despues di tanto aña di investigacion, di tanto aña di incertidumbre y mas cu tur cos ora mi a bay cera 23 dia, nos a bin tuma nota cu henter e caso cu a inicia bao nomber di caso ‘Flamingo’ cu tabata a base di rapportnan di Cuerpo Policial, Bureau Criminele Inteligentie (BCI) di polis y RST, tur a wordo laga un banda, ningun di e argumento of prueba cu supuestamente nan tabatin e tempo ey, no ta na vigor mas,” el a indica.

Esaki, el a menciona, a wordo confirma siman pasa diaranson ora cu recherche a pidi un reaccion di parti di officier di OM den e caso aki ariba e peticion di Oduber cu ta tuma luga dialuna awo 24 di april y den e documentonan oficial cu Oduber a ricibi nan ta mustra cu nan ta bezig ainda den e evaluacion.

“Mi no ta compronde con bo ta bezig cu e evaluacion caminda cu bo a laga tur e argumentonan pa cual bo a encarcela mi, pa cual b’a cuminsa investigacion aki, cay,” el a agrega.

E argumentonan aki, el a informa, ta inclui entre otro e supuesto miyones cu e tabatin riba cuenta di banco na Panama, na Miami, riba terenonan comercial cu, segun acusacion, el a bende y cu su yiu lo a bende etc.

El a sigui indica cu aworaki nan a haya e documento cu ta bisa cu Ministerio Publico no ta den e direccion ey mas y cu awo nan ta buscando den un otro direccion, entre otro riba dos ‘spookambtenaar’ cu supuestamente tabatin, cu tabata cobra pero cu no tabata traha.

Oduber a enfatisa cu el a demostra cu prueba cu el a entrega na Landrecherche cu e argumentonan ey no ta berdad. El a agrega cu banda di esey, Ministerio Publico a purba di bin cu argumentonan ariba un maneho di FIFO, cu su persona mes a introduci di First In First Out, caminda nan a entrega mas di 2.600 tereno e tempo ey na hendenan cu tabata warda for di aña 1993/1994 riba nan tereno.

“E tempo ey tabatin un beleid interno den DIP, na momento cu no tabatin tereno chikito mas pa duna na comunidad. Tur hende ta na haltura di esaki y mi a haya esaki comproba den declaracionnan cu nos a manda tambe pa Ministerio Publico, pa nan tambe tin, di tur e hefenan di departamentonan di DIP cu a declara esaki tabata e maneho, no ta cuestion cu Otmar a invent’e. E tabata parti di e maneho general di gobierno e tempo ey pa nos por otroga un minimo di mil tereno,” Oduber a remarca.

A base di e informacion ey, cu nan no a tuma ningun di e proceso verbal cu a wordo traha door di Cuerpo Policial y Landsrecherche e tempo ey, el a dicidi di entama un caso y entrega un denuncia contra e kehonan aki.

Oduber a splica cu el a entrega un keho pasobra den e documentonan tabatin tambe un proceso verbal di RST cu, segun el a indica, tabata basa completamente riba mentira: “Un pagina cu cinco mentira riba dje. Gañamento manera mi a bisa ayera cu bo por a comproba facilmente.”

El a menciona cu den e documento tabatin poni cu su persona tabata minister na 2015 y cu supuestamente el a otorga terenonan comercial, referiendo na e tereno caminda cu e hotel ta situa aworaki banda di aeropuerto, siendo cu e tereno ey ta un tereno eigendom, pues no tin nada di haci cu gobierno.

El a menciona tambe cu den e documento ta papia cu e tempo ey el a duna e grupo e tempo ey permiso di hotel, mientras cu nunca el a fungi como minister di volksgezondheid, y ta minister di volksgezondheid ta duna permiso di hotel.

“Door di esey nos a dicidi cu bo no por pone un hende pasa tur e dolornan cu nos ta pasando y despues di dos, tres aña di investigacion bo ta bolter henter e esencia di e investigacion,” el a bisa. “Laga mi bisa un cos cla. Tur e decisionnan cu mi a tuma como minister tabata conforme consehonan cu e director y e departamentonan di DIP tabata duna mi persona. No tin un caso caminda cu por bisa cu mi contradeci e director of mi a contradeci e conseho den DIP y forsa nan pa tuma un otro decision,”

Por ultimo, el a remarca cu den bista cu tur e caso aki a cuminsa ariba e PCI di Cuerpo Policial, el a entama un demanda contra e dos ambtenaarnan cu a traha e procesa verbal aki, contra RST completo mirando cu, segun e ta indica, nan a trece documentonan falso pa dilanti y contra Cuerpo Policial di Aruba cu tin e departamento di BCI.