Diamars ultimo, mediante un conferencia di prensa, Otmar Oduber a papia tocante e pensamento cu e tin di reintroduci su mes den arena politico cu un plataforma denomina “Transforma Pais,” esaki pa motibo cu Aruba mester di algo mas cu un partido politico nobo sino di un plataforma unda ciudadanonan por sinti cu nan por uni nan mes na un grupo cu ta traha na beneficio di e comunidad manera el a sigura.
“Pa nos por uni pa loke ta trata crea un fase economico, stabilidad pa e famianan na Aruba caminda hunto nos por trece visionnan pa dilanti, hunto nos por dialoga cu otro y pone enfasis riba e parti di dialogo, pasobra nos kier transforma e pais aki, nos kier transforma e pais Aruba y manera pa haci’e ta hunto den comunicacion cu otro,” Oduber a bisa.
Aparte di esey, Oduber a splica cu e kier haci un dialogo nacional manera a ser publica den nos edicion di ayera, y den esaki kier trece dilanti e parti di edificionan di gobierno cu ta den ruina na e momentonan aki, cu por ser atendi y por genera fondonan pa pais Aruba “pero simplemente ta prefera di sigui huur, ta prefera di traha edificionan nobo sin tin un plan di mantencion pa nan, esey ta e problema di mas grandi y esaki ta e tipo di discusion pa sinta hunto na mesa y no ta necesario pa introduci ni un clase di medidanan pero trece alivio pa e comunidad y reduci gastonan di gobierno,” el a sigura.
Hortamento di tereno na DIP
Pa Oduber, na e momentonan aki ta tumando luga un hortamento di tereno di ciudadanonan y comerciantenan di parti di DIP, “loke DIP ta haciendo no ta normal den un comunidad civico, pa casi cinco aña ta paralisa, nada no ta sali for di DIP, e curason di bo economia, cu paisnan ta usa construccion como un di e pilarnan pa por fortifica y pa por pusha economia, na Aruba tin cinco aña para y nos no ta scucha cu e fervor necesario di nos miembronan di parlamento papia di esaki, e excuus cu pasobra tin investigacionnan ta tumando luga den DIP ta e motibo di pakico DIP no ta subi mas.”
Tin personanan cu tin añanan cu a haya un tereno for di DIP bao di ministerio di Marisol Lopez-Tromp, segun el a menciona, “el a horta for di e comunidad nan oportunidad pa por a haya nan tereno, ta centenares di persona cu e tempo ey tabata warda añanan y a haya un pida di tereno pa por traha nan cas, a haya financiamento di banco y nan a ser obstaculisa, aworaki na 2024, cuatro aña despues ainda no por mira si en berdad bo por otorga e personanan aki nan tereno?”
Pa Oduber economia di Aruba ta stanca pa via di DIP y unico cos ta move economia ta turismo cu ta progresando basta bon despues di pandemia “pero bo no por keda pusha y forsa unicamente ariba un pilar economico y bo ta laga e curason principal di cualkier economia cu ta proyecto di construccion paralisa durante cinco aña, p’esey mi ta denuncia esaki awe, e forma cu DIP, gobierno, ministernan ta laba man y ta permiti un departamento crucial di gobierno keda keto y paralisa durante varios aña ta inaceptabel y e excuus cu tabatin un investigacion no por ta asina cu tin cuatro aña tumando luga.”
Tur permiso di hotel cu ta construyendo awor a ser otorga prome cu 2017
Den comunidad por a mira e reaccion di basta hende pa loke ta trata construccion di hotel, specialmente esun di Eagle Beach cu hasta turistanan a reacciona riba rednan social pa loke ta e construccion desproporcional di hotelnan na Aruba, pa esaki Oduber tambe a reacciona y a bisa cu durante su funcion como minister a percura pa tin un ley pa prohibi benta di hotelnan pa cu all inclusive na Aruba.
Segun el a declara, e mesun ley ey a regula un aspecto cu tabata birando un problema cu tabata e Airbnb cu tabata obliga nan pa tin un ley of permiso di hotel pa e control por tuma luga y gobierno por haya su fearshare di e industria aki cu tabata creciendo pero lamentablemente mucho no a tuma luga den tereno aki, sinembargo, tur e mecanismo di control t’ey pa ser ehecuta caminda cu na momentonan aki e industria aki di Airbnb y other accommodations ta generando mas o menos 30% di e totalidad di acomodacion na Aruba.
Pa loke ta trata otro maneho di ley di final di aña 2018, gobierno di e cual Oduber tabata forma parti di dje como minister di Infrastructura, tabata papia di un voorbereidingsbesluit riba e ley di ROPV cu na e momentonan ey nan tabata finalisando y a ser introduci despues di mas di 12 aña, e ley tabata trata di discusion cu tin awendia tocante construccion di cambernan di hotel na Aruba y otorgamento di tereno pa esey.
“Kiermen ora nos ta papia y cuestiona e cambernan di hotel cu ta ser construi, nos ta lubida cu durante añanan nos a papia di un moratorium cu no tabata existi y a ser crea bao di maneho na 2018 caminda a pone un paro na loke tabata tumando luga,” Oduber a declara.
E motibo di pakico a bin cu esaki tabata debi cu tabatin 6.170 camber di hotel cu a ser otorga door di diferente gobierno prome cu final di 2017, na unda a cuminsa un proceso di reuni cu tur esnan pa por a logra den menos di un aña reduci e lista di e cambernan cu a ser comprometi na menos di 2.500 camber.
“Ainda ta hopi pero tabatin derechonan, varios di nan tabata erfpacht cu ya caba a pasa notario y e hendenan tabatin legalmente derecho y a yega un punto pa por negocia, pero despues di esey e ta bira un daño di perhuicio pa pais Aruba cu bo tin cu paga hopi placa y den 2.500 camber aki a inclui e unico proyecto cu a bin adicional, cu ta e proyecto di Secrets Baby Beach, pasobra mi persona semper a boga pa mi cu un hotel den area aki.” el a comenta.
Pa e discusionnan di kende a duna tereno na Saint Regis, Iberostar na Eagle of expansion di Hilton “tur e permiso aki a ser otorga bao di periodonan prome cu aña 2017, Saint Regis lo ta e cadena hotelero ainda mas halto cu Ritz Carlton den e famia di Marriot y den turismo cu nos ta mercadea aki na Aruba y nos a reduci un derecho cu nan tabatin di 460 camber pa 210 camber cu awe ta ser construi, pa nos pone den perspectiva, un proyecto cu nan tabatin tur derecho legal pa construi riba 460 camber e negociacionnan den gobierno na 2017-2018 a conduci cu nos no a haya un hotel di un calidad mas abou, nos a haya e top hotel y cu Saint Regist ta bay bira e bandera principal di cadena principal di mas halto cu nos ta bay tin na Aruba. ”
