Diahuebs Oscar Lopez Rivera, independentista di Puerto Rico cu tabata den prizon na Merca pa mas di 35 aña y cu na luna di januari a haya pordon di banda di ex-presidente di Merca, Barack Obama, a yega Puerto Rico pa cumpli na cas como prizon, e tempo cu ta resta di su condena, te dia 17 di mei venidero.
E avion cu a transporta Lopez desde Terra Haute, Indiana a aterisa diahuebs atardi na aeropuerto internacional Luis Muñoz Marin di Puerto Rico. Te na momento aki su liberacion tabata den total secreto y ningun di esnan envolvi a papia tocante e topico. “Momento cu nos haya sa cu autoridad di Merca lo duna nos Lopez, pa haci e proceso di pordon, mas facil, nan a bisa nos cu e mester keda den secreto, discreto y sin haci boroto.
Esey tabata e condicionnan y mi a cumpli”. “E operacion di liberacion tabata di perfil abao, caminda ningun hende tabata autorisa pa papia nada”, alcalde di San Juan- Puerto Rico a bisa. Lopez a keda den prizon na Merca pa 35 aña y 8 luna, despues cu el a ser condena pa “delito di conspiracion y otro acusacion tocante su actividad como miembro di grupo di guerrilla yama Forsa Arma di Liberacion Nacional Puertoriqueño (FALN).” Obama a modifica e castigo di Lopez pa un castigo menor, manera prizon den cas, riba dia 17 di januari . Lopez ta un heroe pa hopi hende na Puerto Rico y Latino America.
