Orwin Gomes, kende a caba su estudio HBO na Lucia Marthas Institute for Performing Arts, ta actualmente na Aruba pa duna tayer pa siña nan mas di baile moderno, comercial y mas.

Gomes a dicidi bin Aruba despues di su caba su estudio pa asina duna oportunidad na Arubiano pa wak e diferencia entre Hulanda y Aruba. E ta bay enfoca riba locual e mes a siña na e instituto.

“Tin baile moderno, heels class, ballet y urban comercial. Tambe con pa nan hunga cu e camara pasobra awendia esey ta na moda na mundo. Mi a cuminsa na 4 scol di baile, Step by Step (unda mi mes a cuminsa baila), Simadanza, Scol di Baile Diana Antoinette y Club di Movimiento.”

E ta bisa cu tayer ta keda pa esunnan cu ta asistiendo e scol di baile, pero lo bin cu un mas grandi, den cual cu hende cu no ta atende e scolnan di baile menciona tambe por participa den tuma les, siña algo nobo y despues drenta un scol di baile.

E tayer tabata di edad 12 bay ariba. Segun Gomes, na edad ey e hoben ta cuminsa conoce su mes y sa kico e kier. Tambe baile ta bon pa salud, ta siña algo otro y ta conocemento di con e expresion artistico aki ta pafo di Aruba.

Gomes ta bisa cu den mundo di baile semper tin cosnan nobo. “Ami ta purbando pa bay Merca pa sigui avansa pa mi mes, pero tambe purbando den futuro pa lanta un estudio aki na Aruba pa e hubentud por siña baila, actua y canta.”

Pa Gomes, Aruba ta un poco atrasa pa locual ta arte di baile y ‘mester mehora esey’. E ta comparti cu Aruba tin talento. djis mester hende di afo pa yuda, ‘ami ta un di nan cu a bisa laga mi bin Aruba’ pa asina ofrece su talento cu tayer y habri wowo di studiante cu nan kier/por bay sigui studia canto of baile, ‘of algo cu nan por bay dilanti’.

A puntra Gomes, ki su pensamento ta ora hende bisa cu arte di baile no ta paga. E ta contesta cu e pensamento ey ta ekiboca, pa motibo cu tin hopi cos cu por haci y ta haya pago p’e manera modela, crucero, musical, duna les di baile, baila den profesional den compania, baila pa un artista y biaha rond conoce tambe.

Un otro forma cu por gana extra, e ta splica cu por haci tayer pa asina genera entrada tambe. “No tur mayor ta consciente cu tur profesion ta paga, depende con ta hink’e den otro. E manera di pensa ta hunga un rol. Bo tin cu traha duro, pasobra nada na mundo ta facil. Traha duro pa logra”, Gomes ta expresa.

Gomes a bisa cu experiencia dunando tayer tabata ‘inolvidabel’ unda cu e muchanan a mustra entusiasma pa ricibi lesnan diferente, den otro nivel. Un nivel cu ta na moda awendia. Segun su experiencia, e ta remarca cu e ta sinti bon pa por inspira e hubentud pa nan traha mas duro y studia baile, ‘esey tabata interesante pa wak tambe pa yuda con pa drenta bay Hulanda’.

Pa locual ta trata e dianan cu el a duna e tayer, e ta splica cu cada dia tabata druk; sinembargo esey ta locual e gusta haci y mucha ta inspira pa sigui traha dilanti y e mes como persona logra bay mas leu den bida.

Actualmente e tayer ta cabando, pero e ta bisa cu e ta spera den futuro e por duna mas y aporta. Pa sigui drenta e scolnan di baile, siña tecnica nobo y pone e studiante di baile na un nivel mas halto, pa nan ta prepara pa studia afo.

Pa finalisa, Gomes a bisa cu el a bay Cuba anto el a ripara con eynan ta duna sosten na nan artista, unda cu na Aruba ta dificil pa mira esey den e area di sponsor cu mucho biaha ta falta y cu ta necesario pa mustra sosten.

“Eynan tin cu cuminsa: Duna mas atencion na arte, baile, canto, actuacion, pintamento; pasobra talento tin, pero no tin placa pa paga cierto cosnan. Spera asina por duna sosten na e scol di baile cu tambe ta pasa den dificultad”, Gomes ta expresa.