Recientemente un delegacion den e deporte di karate a biaha pa Paramaribo, Surinam unda nan a competi contra di e miho paisnan den nos region den e Caribbean Karate Championship 2017. Mester bisa cu den e fin di siman tras di lomba e competencia a tuma lugar unda nos karatekanan a logra conkista un total di 9 medaya y ta hasi un papel di kita sombre. E atletanan cu a triunfa cu nan medaya tabata Madison Williams – Kumite Female 12-13 aña cu ta logra un medaya di Brons, tambe nos tin Christopher Carraha – Male 12-13 anja cu ta logra conkista dos medaya di Brons esaki den e disciplinanan di Kata y Kumite.
Un otro atleta cu tambe a logra medaya ta Keven Prada 12-13 anja -Kata Male cu ta logra gana dos medaya di Plata esakinan den Kata y Kumite. Por ultimo nos tin Catherine Carraha – Senior Kata cu ta gana medaya di Brons, den e U21 Kata e ta conkista medaya di Oro, den U21 e ta logra medaya di Plata den Kumite den e categoria -68kg y un medaya di Brons den e Senior Kumite -61kg.
Si tabata tin un deporte na Aruba cu a conoce un crecimento enorme ta e deporte di karate. E federacion di karate, Aruba Karate Bond ta trahando hopi duro na e bon desaroyo di nan atletanan y ta hopi orguyoso di e prestacion di nan atletanan, principalmente e logronan na nivel internacional di nan atletanan. Den nos region Aruba a bira conoci pa duna bon bataya y conkista titulo. Mas cu claro esaki ta danki na e scolnan y e dirigentenan capacita cu tur dia ta dirigi nan atletanan den e mihor forma posibel. Es mas e deporte di karate lo por bira un di esnan eligi pa forma parti di e Weganan Olimpico di Tokyo 2020, mientras cu Aruba sin duda algun tin algun atleta cu lo sonja pa forma parti di e evento aki.
Pa e motibo aki tambe Lotto, e loteria di Aruba ta felicita e delegacion di Karate y coach Sensei Armando Pazos como tambe Aruba Karate Bond cu e tremendo trabou desplega den e Caribbean Karate Championship.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
