Dos weekend atras, varios persona di nacionalidad Venezolano a sali cu boto for di varios punto di estado Falcon na caminda pa Aruba. Algun di nan ta desaparecido ainda, na unda organismonan Venezolano ta continua den nan buskeda.
Segun e medio Venezolano Falcon Informativo a publica ayera, secretario di Seguridad Ciudadano, general Miguel Morales Miranda y comandante di ZODI-FALCÓN GD Félix Arnós Rodríguez, a informa cu e labornan di buskeda maritimo conhuntamente cu ekipo di Zona Operativo di Defensa Maritimo y Insular Occidental (ZODIMAINOC) lidera pa vice-almirante Andrés Arbeláez Duarte, a cuminsa for di prome momento cu nan a haya e noticia di e desaparicion di 9 persona cu a sali di forma ilegal cu e boto “La Rogui” for di Buchuaco, na Falcon, cu destino Aruba e dia 9 di december ultimo.
Den esaki a splica cu un accion di buskeda ta tumando luga di manera articula y te ayera nan tabata cumpliendo cu instruccionnan di gobernador di Falcon, Victor Clark Boscan.
E rapport duna pa autoridadnan ta indica cu te ayera a cumpli cu e patronchi di buskeda corespondiente pa e dianan 11,13,15 y 17 di december, empleando unidadnan Naval di Forsa Arma Nacional Bolivariano di Patruya Guardacosta di Punto Fijo bao mando di ZODIMAINOC, cubriendo un ruta di estado Falcon y awanan di Golfo di Venezuela, sin haya resultadonan positivo.
Finalmente nan a afirma cu ta continua cu e labornan di buskeda, reforsa cu apoyo aereo, ademas di colaboracion di autoridadnan policial di Aruba, Kustwacht, JRCC di Corsou, Guardacostas Punta Espada di Colombia y Grupo di Guardacostas di Caribe di Armada Colombiano, uniendo esfuersonan pa logra ubica e ciudadanonan aki.
Igualmente, nan a haci un yamado na ciudadanonan pa no expone nan bida den e tipo di travesia aki cu botonan cu no ta cumpli cu ni un tipo seguridad y mas ainda, tras di lomba di autoridadnan, recoriendo luganan no habilita cu tin biaha ta trece consecuencianan fatal, manera tambe a sucede recientemente cu otro cuatro ciudadano Venezolano.
