Ayera nos a publica un articulo unda Aruba Art Fair a wordo critica pa no envolve artistanan local aña pasa. A logra haya reaccion di Tito Bolivar, un di e organisadonan.

Entre otro, a wordo critica cu e no tin suficiente interes pa cumpra arte riba e isla. Un artista en particular cu lo kier permanece anonimo a declara na Bon Dia Aruba cu ‘aña pasa mi no a participa cu Art Fair, y e aña aki tampoco mi lo participa’.

E artista anonimo a expresa cu ‘no tin presupuesto pa artista local. Tin placa pa paga tur hende menos e artista. Mi ta kere cu e artista local tambe tin derecho pa ta paga pa su trabou’.

Banda di esaki e artista anonimo a splica cu ‘mi no por depende riba un benta si bendemento di arte ta algo nihil riba Aruba’. E artista ta describi su arte manera un estilo di arte cu ‘no ta comercial’. Tambe e artista anonimo a expresa cu e mercado di Art Fair no ta uno unda e ta pensa cu hende lo cumpra un piesa na balor di mas cu 1000 florin, por ehempel.

Envolvimento di artista local

Tito Bolivar, un di e organisadonan di e evento, a declara na e matutino aki cu ‘contrario na e palabranan cu bo ta tende riba caya, nos no a paga ningun artista cu a participa cu e Art Fair’.

Sr. Bolivar a splica cu e aña aki tin 3 artista local cu kier traha riba muraya, cual a acerk’e. “Mi ta djis pidi pa nan mustra mi kico nan kier haci, cuanto pintura of material nan mester y nos lo duna nan coy bebe y coy come. Mescos cu artistanan di afo.”

Aparte di esaki, sr. Bolivar a bisa cu ‘nos tin expectativa di tur artista di afo pa tambe contribui un tiki bek na e local nan. Esaki lo pasa pa medio di un tayer’. Sr. Bolivar a splica cu aña pasa e tayer di Bordalo II a bay hopi bon. “Tur e personanan cu a participa nan trabou ta riba muraya. Mi ta spera e aña aki bin mas interes den e tayernan di artista internacional E idea ta pa cada aña nos baha e cantidad di participante internacional y subi e participantenan local.”

E aña aki sr. Bolivar ta conta cu 4 artista local caba kier participa cu e Art Fair. E artistanan cu te awo lo participa cu un mural ta: Reginald de Palm (Quake), Robert Solognier, Armando Goedgedrag y Paul Wong. E aña aki tambe un persona local lo fungi como curator, esta Eduardo Valbuena.

“E idea ta pa subi cada aña e cantidad di participantenan local y baha e cantidad di participante internacional envolvi cu e proyecto directamente. Mi ta kere tambe cu e ta importante pa e artistanan local participa pa por mustra un bon representacion di e artistanan riba Aruba.”

Limitacion di fondo

Segun sr. Bolivar, e problema ta cu hopi artista local ta pidi sumanan cu ta varia entre 15.000 florin y 30.000 florin pa nan trabou. “Anos como organisacion no por paga pa esey.”

Segun e, e unico artistanan cu a wordo paga pa nan trabou ta esunnan cu a traha riba e proyecto di aloe y un di e artistanan di performance riba e anochi cu a habri e Art Fair.

Segun sr. Bolivar ta splica: “Hopi di e cumpradonan ta hende anonimo cu a bin despues di e Art Fair pa palabra cu mi cua piesa nan ta interesa den dje. Ora cu mi a pidi pa potret cu nan, nan a nenga mi esaki pasobra nan no tabata kier pa niun artista bay reclama nan despues.”

E organisado ta splica cu al contrario di loke hopi artista ta pensa, ‘esaki ta un Art Fair cu ta accesibel libremente pa e artista, compara cu e ferianan di arte rond mundo cu e participantenan mester paga pa drenta’.

E organisadonan a haya dificultad pa haya fondonan e aña aki. Esaki debido na e situacion politico. Un ehempel di esaki ta cu e galeria cu e proyecto a habri aña pasa, galeria di arte ArtisA, a cera. Sr. Bolivar ta comenta: “Esaki ta conoci cu e minister encarga a tuma su retiro, y esaki a haci’e dificil pa nos pasobra nos tabatin un relacion cercano cu e so. Nos no tin partnership cu gobierno awor aki.”

Segun sr. Bolivar, e galeria tabata den un estado indefini pasobra tabata falta fondo. “Ora cu biblioteca a acerca nos, nos a duna e luga di biaha pasobra nos mester siña con pa habri un galeria riba un termino largo.Nos a purba limita e proyectonan rond di e feria di arte pa asina enfoca riba e evento mes y gasta menos riba cosnan cu no ta parti di e experiencia.”

Colaboracion cu otro instancianan

Aña pasa a mira un colaboracion cu diferente instancianan pa e anochi di e feria di arte. Ateliers ‘89, Academy of Fine Arts & Design, Korteweg, Museo di Industria y Cosecha, tur a colabora di algun manera. Sr. Bolivar a clarifica cu Cosecha, Korteweg y Museo di Industria lo participa e aña aki atrobe.

“Cosecha lo ta habri cu nan artesanonan cu Seyo Nacional y riba caya Korteweg lo tin artista y artesano sin Seyo.”

Nos a tuma contacto cu Elvis Lopez, director di Ateliers ‘89 pa clarifica dicon no lo participa e aña aki. “Nan no a trata mi bon aña pasa”, sr. Lopez ta expresa. “Mi a purba duna mi sosten pasobra mi a kere cu nan sa di arte pero esaki no a resulta di ta berdad. Pero mi no ta kere cu un persona cu no sa di arte por dirigi un evento asina.”

Sr. Lopez ta termina bisando cu ‘e evento tabata leuk pasobra hopi hende a bay, pero pa ningun otro rason’.

Sr. Bolivar ta splica cu un di e partnernan e aña aki lo ta Prins Bernhard Cultuurfonds, cual lo trece diferente artistanan di afo. “E idea ta pa artistanan local expone nan mes pa asina e fondonan manera Prins Bernhard of Unoca conoce nan tambe.” Pero e ta subraya cu Prins Bernhard Cultuurfonds no lo ta un fundado di e proyecto, ya cu ‘nos ta prefera pa tin nan como un partner y di e manera aki nos por crea mas conexion’.