Diahuebs ultimo, 18 di augustus, Prome Minister Evelyn Wever- Croes, hunto cu Vice Prome Minister, Ursell Arends a anuncia cu no lo introduci BTW mas na januari 2023, pero mas bien lo aumenta e tarifa di BBO cu 1% of 1.5%. E aumento ta stop temporalmente e introduccion di BTW cu aworaki ta poni pa wordo introduci januari 2024.

Prome Minister a splica durante e conferencia di prensa cu e Reforma Fiscal ta parti di un di e acuerdonan haci cu Hulanda den cuadro di e landspakket y un parti di e Reforma Fiscal ta e BTW. Den cuadro cu esaki Departamento di Impuesto, como tambe Prome Minister, a reuni cu gremionan y a scucha e preocupacionnan di gremio comercial, sindical y di comunidad en general riba e introduccion di BTW.

E preocupacion principal cu tin, Prome Minister a remarca, ta e efecto inflatorio cu esaki lo tin, pero tambe e preocupacion di comercio ora a indica cu lo no bay baha BBO pa despues bin cu BTW. Tur esaki lo causa un efecto inflatorio mas halto ainda.

Si introduci e BTW sin kita e BBO, e impacto riba inflacion lo ta mas cu 15%, mientras cu kitando e BBO, e ta casi 11%. “Lo tin un inflacion mucho grandi. Pues, a dicidi cu awor no ta prudente pa introduci e BTW pa prome di Januari 2023”, Prome Minister a indica.

Gobierno di Aruba a tuma e decision den consulta cu henter e ekipo di finanzas pa no introduci BTW y aumenta BBO. “E efecto inflatorio di e BTW ta casi cuater mas halto cu djis hisa BBO,” Prome Minister a bisa. El a agrega cu nan tin pensa pa bin cu compensacion pa medio di reduccion di inkomsten belasting pa cierto categoria di trahado y pensionado.

Den cuadro cu esaki 17 organisacion representando comercio, doñonan di trabao y empleadonan, a manda firma declaracion pa Prome Minister, Minister di Finanzas y Cultura, Xiomara Maduro y Minister di Asuntonan Economico, Comunicacion y Desaroyo Sostenibel, Geoffrey Wever, como tambe pa Parlamento di Aruba, Raad van Advies y College Aruba Financieel Toezicht (CAft), referente e reforma fiscal.

Den e declaracion aki e diferente organisacionnan aki AFCA, AFBA, AHATA, AJA, ATIA, ATSA, CUA, IAA, KVK, SEPPA, SIMAR, SNBA, SPA, STT, VRPA, VWI y WAB ta expresa nan preocupacion y ta conseha Gobierno di Aruba pa no implementa ningun reforma fiscal of ni aumenta e carga actual, esta BBO, di ningun forma te ora cu e stakeholders concerni a haya suficiente tempo pa analisa y proporciona comentario ariba e legislacion proponi.

E organisacionnan ta indica cu e stakeholders lo instala un comision di tres experto den e materia pa analisa e medidanan di e Reforma Fiscal cu Gobierno di Aruba ta propone, determina e consecuencianan, financiero, economico y social di e reforma, y proporciona sugerencia- of consehonan realista pa loke ta trata un Reforma Fiscal cu ta adecua pa e bienestar di Aruba a largo plaso.

Ariba mas cu un ocasion gremio comercial a vocifera nan posicion referente BTW. Frans Ponson, presidente di Comerciante Uni Aruba (CUA), a remarca varios biaha cu BTW no ta algo malo. El a splica cu esaki lo yuda cu cumplimento, locual ta bay trece mas placa den caha di gobierno, pero segun Ponson ta subraya y manera CUA a yega di menciona caba, BTW ta un sistema cu niun comerciante na Aruba a traha cune y no ta algo cu por wordo implementa den dos of tres luna. “BBO mes cu tin mas cu 15 aña cu a implement’e, ainda tin comerciante cu ta hacie malo”, el a señala.

Inicialmente Gobierno di Aruba a indica cu nan kier implementa BTW na final di aña, pues entrante 1 di januari 2023 y na esaki CUA a responde cu a esey ta imposibel. El a enfatisa cu nan ta pro BTW pero nan kier pa e wordo implementa di e manera corecto.

Durante e conferencia Prome Minister a bisa cu gremio comercial mes a sugeri pa hisa BBO, pero presidente di CUA, Ponson a desmenti esaki. Ponson a bisa cu e decision pa hisa BBO cu 1% of probablemente cu 1.5% ta bay crea caos den comunidad. Ponson a haci un calculacion cuanto e BBO lo bira si hisa cu 1.5% y e cifra ta 8.1% pa e consumidor.

“Ora cu a dicidi pa cobra BBO riba BBO, e ta nifica cu e comerciante mester cobra e consumidor mas cu djis e cifra di BBO. Y tin hopi cadena. Cu dos cadena ya caba e BBO ta bay bira 16.2%.” E consecuencia di esaki ta cu mas hende cu nunca lo cumpra nan producto directo for di Amazon lo cuminsa haci esaki.

“Kizas hopi hende no ta realisa cu ya caba Amazon ta manda un container pa siman. Consumidornan lo bay cumpra directo y esey lo nifica un caos grandi.” Den otro palabra, Ponson ta premira cu mas negoshi lo cera nan porta y cu Gobierno di Aruba ta bay logra net lo contrario cu locual nan kier.