Ayera tardi directornan di organisacionnan Reclassering di Aruba, Corsou, Boneiro, Sint Maarten y Hulanda a firma un protocol referente traspaso di clientenan hudicial ambulante entre Reino Hulandes. Despues di firmamento directornan di Reclassering Aruba, Hulanda y Caribe Hulandes (Boneiro) a duna declaracion na prensa tocante kico e protocol ta encera.
Seraida Pemberton-Leonard, director Stichting Reclassering en Jeugdbescherming Aruba, a splica cu e protocol aki pa uno cu a ser firma na 2017 y cu aworaki a realisa algun adaptacion na dje pa motibo cu nan tin basta tempo ta ehecutele y despues di adaptacionnan realisa a firma e protocol.
El a sigui splica cu tin un acuerdo entre Aruba, Corsou, Boneiro, Sint Maarten y Hulanda den con ta atende cu clientenan ambulante cu sea ta di Aruba cu ta bay biba na Hulanda, of andersom, cu tin un sentencia cu ta haci cu nan ta cay bou di guia di reclassering. Cu e protocol aki e organisacionnan ta intercambia e sentencianan pa ser ehecuta na e pais cu e persona a bay biba.
El a indica cu e adaptacion ta encera detayesnan manera ki momento ta cera un caso y mand’e back, cual ta e organisacion cu ta responsabel pa ehecucion of duna e guia, cuanto biaha mester raporta na e pais cu a tuma over e guia, entre otro.
Pemberton-Leonard a splica cu na momento cu un persona cay cera y e ser poni bou di guia di reclassering, e organisacion ta responsable pa ehecuta e guia. Y den caso cu e hende ta bay biba afo, e guia no ta stop. Reclassering Aruba ta pasa e caso over na e pais cu e persona a bay of ora nan haya un sentencia na otro pais y nan bin biba back Aruba, e organisacion reclassering di e pais ta manda e caso y e ora reclassering Aruba ta responabel pa ehecuta e sentencia.
“No ta pasobra un hende a bay afo nan ta pensa cu nan guia di reclassering a stop. Nos ta pasa e caso over na e pais unda e persona a bay,” el a remarca.
Pa loke ta cifranan di casonan,Pemberton-Leonard a indica cu no ta cantidad hopi halto pero e ta basta transparente cu e hendenan ta intercambia. Den practica, el a splica, e protocol ta bayendo bon y e delegacionnan a evalua con e ta bayendo en general tambe. “For di basta tempo ta evaluando con e ta bayendo. E contacto entre e organisacionnan reclassering dentro di Reino y Hulanda. Nos ta bezig ta evalu’e y a base di e evaluacion nos a adapta algun detayes y a firma e protocol,” el a bisa.
Erik Sinke, director di Stichting Reclassering Caribe Hulandes (Boneiro) a remarca cu e protocol ta hopi importante pasobra tin laso di famia entre Corsou, Aruba, y Boneiro y hendenan ta biaha hopi entre e islanan. Pa e motibo ey, el a indica, ta importante pa por traspasa e casonan di e organisacionnan reclassering pa nan por continua na un otro pais.
Pa loke ta con e protocol ta bay den practica el splica cu e ta bay bon. El a sigui splica cu e manera di traha cu e casonan di reclassering ta mas o menos mescos den tur pais, loke ta haci cu den practica e ta facil pa biaha entre e paisnan y traspasa e casonan.
Tocante e cooperacion entre e organisacionnan di reclassering den Reino, Sinke a subraya cu esaki ta hopi bon. El a indica cu e directornan tin contacto regularmente y ta traha hunto di cerca.
Jochem Wilderman, director di e Departamento Internacional di Reclassering Hulanda a remarca cu e ta mira e protocol nobo entre e organisacionnan di Reclassering den Reino
hopi positivo pasobra asina nan ta ofrece seguridad den e Reino, pero tambe certesa legal.
“Dus si bo tin un medida di reclassering cu un hues a impone, e medidanan ta ser ehecuta, no importa unda den e Reino bo ta. Esey ta un contribucion na e credibilidad, e confiansa, no solamente pa e organisacion di reclassering, pero tambe pa e sentencianan,” el a subraya.
Pa loke ta e cooperacion cu e otro partnernan den Reino, el a splica cu e ta bay hopi bon, mas cu awor e protocol a ser renoba. Esaki ta yuda pa nan sa precies kico mester haci, ta haci posibel cu nan por haya otro facil y tin comunicacion directo.
Tocante e protocol mes, si e ta desea di mira algo nobo of diferente den e protocol of si tin algun obstaculo of perspectiva pa un protocol nobo, Wilderman a splica cu e hecho cu nan ta sigui cu e protocol ta un indicacion cu eventualmente e mester ser estableci den ley di Reino, den e statuutnan, locual no ta e caso ainda.
El a indica cu awor tin e protocol pa regula esaki, pero eventualmente, esaki mester ser pone den e ley mes, den e statuutnan di e Reino, y e protocol aki ta un paso den e direccion ey. “Mi ta kere nos lo sigui pusha pa esaki, of sigui propone esaki tambe na Den Haag, pa crea un proposicion di ley,” el a remarca.
Por ultimo, tocante kico a bay diferente compara cu e ultimo añanan, y kico nan kier mira diferente pa e añanan cu ta bin, Wilderman a splica cu nan kier pa asina cu medidanan di reclassering cu ta ser traspasa, of hende cu ta muda for di Reino, cu e medidanan realmente ta ser ehecuta.
“Esey ta yuda cu e credibilidad. Si bo haci algo na Aruba, y bo bay Hulanda, cu e tambe ta ser sigui ey. Y pasobra nos a firma e protocol nobo, e posibilidad cu esey ta pasa ta mas grandi,” el a remarca.
