Den un carta abierto fecha 11 di maart 2024, dirigi na Corte di Casacion na Hulanda, presidente di Iglesianan Cristian di Aruba (ICA), Sr. Gilberto Martes; presidente di Asociacion Pastoornan di Corsou (APK), Said Flores; y presidente di Sint Martin United Ministerial Foundation, Orlando Wilson, a trece pa dilanti diferente punto relaciona na e tema di legalisacion di matrimonio homosexual na Aruba y Corsou.

Den e carta, presidentenan di e organisacionnan di iglesia- y pastoornan ta trece na atencion di e Honorable Miembronan di Corte Superior algun punto cu ta remarca nan posicion y nan opinion ariba e tema di matrimonio homosexual na Corsou y Aruba, ariba cual ainda Corte Superior no a duna un veredicto.

 

Nan ta indica cu den su consideracion di dia 6 di december 2022 si por papia di discriminacion, Corte ta bisa cu matrimonio homosexual ta comparabel cu matrimonio heterosexual y p’esey e ta igual cu matrimonio homosexual.

Nan ta remarca cu e conclusion aki ta bay contra articulo 12 di Tratado Europeo pa Derecho Humano (TEDH), pasobra consecuentemente no por papia di discriminacion; e veredicto di Corte Europeo pa Derecho Humano (CEDH) di 24 di juni 2010 cu ta bisa cu CEDH no por impone matrimonio homosexual riba paisnan miembro; y contra Codigonan Civil di Corsou, Aruba y St. Maarten cu ta declara cu ‘matrimonio por existi solamente entre un homber y un muhe.’

 

E grupo di organisacionnan religioso ta señala cu Corte ta bisa cu Constitucion ta condena e Codigo Civil di e islanan riba ‘discriminacion.’ Cual nan ta subraya ta un conclusion incorecto. E presidentenan religioso ta sigui indica cu Corte mester a evalua Codigo Civil di e islanan a base di e TEDH y yega na e conclusion cu no por interpreta e Codigo Civil contrario na TEDH.

 

E gruponan religioso ta indica cu tanto Corte como Abogado General di Corte Superior ta cita cu tin un grado halto di aceptacion di homosexualidad den e paisnan concerni di reino, pero nan ta señala, for di nan punto di bista, cu aceptacion no ta un argumento solido si tene cuenta cu algun punto.

Nan ta menciona cu aumento di aceptacion na Europa no tabata motibo pa CEDH legalisa matrimonio homosexual, e gobiernonan concerni a bay den apelacion dos biaha contra e veredicto, e proposicion di ley pa matrimonio homosexual cu a entrega na 2019 na Parlamento di Corsou no a sigui cana, cu na Aruba un accion di firma espontaneo contra matrimonio homosexual na 2023 a produci mas cu 16.000 firma, cual ta ekivalente na 5 asiento.

Nan ta sigui menciona cu a pesar cu na Hulanda supuestamente tin aceptacion grandi, nan ta usa ley penal na un forma represivo contra esnan cu no ta di acuerdo cu e ideologia di genero, cu despues di dos decada solamente 35 di e 193 pais afilia na Nacionnan Uni a legalisa matrimonio homosexual y ta solamente 3 pais a haci esaki pa medio di un referendum, cu 82% di e paisnan di afilia na Nacionnan Uni ta rechasa matrimonio homosexual y por ultimo nan ta indica cu e expectativa cu Corsou y Aruba ta dispuesto di apela un eventual decision negativo na un Corte mas halto.

 

E presidentenan di e organisacionnan di iglesia- y pastoornan ta splica cu CEDH den varios sentencia a confirma cu no ta existi derecho riba matrimonio homosexual y asina mes CEDH ta exigi di e paisnan miembro pa ofrece un alternativa riba matrimonio homosexual.

Nan ta sigui splica cu e unico diferencia entre matrimonio civil y union civil ta e cantidad di derecho cu cada uno ta duna y como cu union civil ta encera e relacion intimo tambe, paisnan miembro ta wordo forsa pa reconoce e relacion homosexual y pa duna derecho na esaki.

E grupo religioso ta señala cu CEDH ta admiti tambe cu e obligacion aki ta basa solamente y unicamente riba e argumento subhetivo di aceptacion bou di e pueblo Europeo y no riba derecho humano. Nan ta remarca cu aki ta trata di fabor na parehanan homosexual y no derecho humano. Algo cu nan ta indica cu, for di nan punto di bista, ta duna derecho cu no ta basa riba ningun derecho, locual nan ta resalta ta trece contradiccionnan serio.

Nan ta resalta cu den area di Caribe absolutamente no por papia di ‘rapid evolution of social attitudes towards same-sex couples.’ Nan a sigui na señala cu den varios estado di Caribe hasta tin ley contra sodomia y cu e teritorionan cu ya a introduci matrimonio homosexual, manera islanan BES y Departamentonan Frances, ta teritorionan di ex colonisadonan cu tabatin poco libertad den esaki.

 

E presidentenan di e gruponan religioso a cita un texto di Bijbel cu ta bisa: “Pasobra ora e paganonan (no Hudiunan), kendenan no tin Ley, di naturalesa ta haci e cosnan di Ley, esakinan, aunke nan no tin Ley, ta un ley pa nan mes, door cu nan ta mustra e obra di Ley cu ta skirbi den nan curason”

 

Den e carta nan ta trece pa dilanti tambe cu, saliendo for di nan punto di bista, un di e motibonan pakico problemanan mental ta hopi halto bao di homosexualnan ta pasobra hende tin consenshi duna door di Dios pa cual consenshi di bon y malo ta registra den e alma.

“Homosexualidad ta un violacion di e ley interno di Dios, p’esey esun envolvi den esaki ta experiencia trastorno mental continuo. E realidad ta cu no ta e atraccion ta locual ta causa trastorno mental sino hustamente entrega na deseonan homosexual. Si usa e curpa na un manera cu no ta cuadra cu su diseño y funcion esaki ta conduci na problemanan mental y fisico,” nan a expresa.

 

Por ultimo nan a menciona cu Hof a bisa cu adopcion no ta relevante den e caso aki, pero hues mester por premira cu unabes matrimonio homosexual ta reconoci pa ley esaki lo afecta derecho y libertadnan di otro personanan.

 

Algun ehempel di derecho y libertadnan cu por ser afecta den caso cu reconoce e ley di matrimonio di mesun sexo u nan ta menciona ta e derecho di mucha pa lanta cu un figura di tata y mama, e libertad di duna asistencia na un persona cu no ta desea di entrega na su deseonan sexual pa personanan di mesun sexo y e derecho di mayornan pa mantene e libertad pa nan yiunan no wordo siña cu comportacion homosexual ta natural.

Reportero di Bon Dia Aruba a tuma contacto cu presidente di Iglesianan Cristian di Aruba (ICA), Sr. Gilberto Martes, pa duna comentario y elabora ariba algun punto di atencion, pero no a haya respuesta prome cu ciere di edicion.