Manera a keda publica ayera den nos edicion di Bon Dia Aruba, HAVA y ASHA a propone un contribucion propio (eigen bijdrage) di 100 florin na spoedeisende hulp. Esaki den marco cu e condicion cu Gobierno di Hulanda a pone pa Aruba pa por ricibi sosten di likides, cual ta cu mester corta 60 miyon den gastonan di AZV.
Diferente organisacion di sector di cuido di Aruba: Arubaanse Bond voor Verpleegkundigen, Botica’s vereniging Aruba, FSMA Respaldo, Huisartsen Vereniging Aruba, Instituto Medico San Nicolas, Stichting Ziekenverpleging Aruba, Vereniging medisch specialisten ziekenhuis Aruba, Vereniging Private Laboratoria Aruba, Vereniging Medisch Specialisten Aruba y Vereniging van Apothekers op Aruba, a manda un carta dirigi na Ministerraad di Aruba, Raad van Commissarissen di AZV y Gobierno di Aruba indicando nan obhecion contra e introduccion di un contribucion propio.
Den e carta, e grupo di organisacionnan aki ta indica nan preocupacionnan grandi y preguntanan tocante e anuncio di introduccion di un contribucion propio entrante 1 di april. Nan ta señala cu no ta cla si pa e tumamento di decisionnan relevante e mandato ta cay cerca Staten van Aruba of e Raad van Commissarissen di e UO AZV, y pasobra den ambos caso ta parce necesario un papel formal di Staten en todo caso, nan a dirigi nan mes na tur tres partido menciona anteriormente.
“Cu gratitud nos ta nos ta informa tambe cu Minister di Turismo y Salud Publico a scucha y a compronde nos preocupacionnan diaranson dia 8, y cu pa su persona esaki tabata e rason pakico el a solicita un cita inmediatamente pa e representantenan di nos gruponan cu e director di AZV. Nos ta gradici e velocidad cu cual actualmente nos señal ta wordo capta y e disposicion cu ta wordo demostra pa involucra activamente e sector di salud den e conocementonan, analisis, consideracionnan y decisionnan final cu ta hunga un rol den e introduccion previsto di contribucion propio den e sistema di salud di Aruba”, e carta ta relata.
Nan ta subraya cu desde e sector sanitario, nan gusta reflexiona ariba e sostenibilidad y accesibilidad di e sistema di AZV, pero tocante e tema di contribucion propio, sector salud ainda no a wordo consulta.
Nan a menciona tambe cu nan a splica e Minister cu esaki por genera falta di claridad, inkietud y incluso por reforsa e percepcion cu e politica gubernamental den e sector di cuido ta wordo conforma unilateralmente na momento cu no ta involucra e dunadornan di cuido den e preparacion di formulacion di politicanan.
“Bon gobernacion den temponan di cambionan grandi, esey ta caracterisa, entre otro, pa e participacion oportuno di partidonan interesa relevante. Manera a wordo menciona caba, Minister di Turismo a tuma e señal aki na serio, nos ta spera cu pronto lo tin mas informacion ariba oportunidad-, problema- y desafionan cu ta wordo discuti”, nan a indica den e carta.
E grupo di organisacionnan aki ta indica cu te cu dia 8 di februari tabata posible pa solamente deduci di informacionnan tocante e tema aki den medionan di comunicacion, comunica cu lo introduci e contribucion propio, cuanto esaki lo mester bira y pa cua actividad di cuido esaki lo conta. Ainda no tabatin suficiente informacion ariba e decisionnan cu a tuma, e analisis anterior y aprobacion di interesnan cu a tuma luga.
E grupo a enfatisa den e carta cu ainda nan no ta sigur si, y con e analisis di e National Zorgcommissie, cu a wordo comparti cu tur stakeholdersnan na juni 2021, lo wordo teni na cuenta den e evaluacion y con e aporte di e sector sanitario tocante e contribucion propio a wordo mira den zomer di 2020.
Nan ta remarca cu e falta di coordinacion grandi te cu aworaki por hiba na hopi decepcion di hopi partido interesa y ta menasa di contribui na e ideologia cu den Gobierno no ta presta suficiente atencion pa realmente aborda e problemanan principal cu e sistema di AZV ta enfrenta hunto.
Aunke nan a señala cu nan ta wak e stapnan di e ultimo dianan manera señalnan positivo cu e coordinacion y preparacion di politicanan tocante e tema aki, y otro temanan relevante pa e sistema di atencion di salud tin prioridad ariba e agenda.
“Basa ariba e informacion sustantivo cu ta conoci, den nos opinion e iniciativanan potencial cu ta conoci ta crea hopi division entre e pashentnan, ta promove atencion di clase y ta aumenta e riesgo di fraude y tambe abuso verbal y situacionnan insigur pa e empleadonan”, e carta ta indica.
Ademas nan ta remarca cu e propuesta di introduccion di contribucion propio ta supera su obhetivo di spaar, pasobra e cobramento mester wordo haci pa e proveedor di atencion medico, lo mester tin trahado y administracion adicional cu e costonan asocia y riesgonan, y ta promove descuido di atencion medico.
Nan ta indica cu e plannan presenta te aworaki den medionan di comunicacion no solamente ta bay contra e obhetivo di AZV, si no cu nan ta eticamente condenabel ariba e base di principionan fundamental cu ta rondona e derecho na salud, principio di eficiencia y eficacia, un desaster pa e operacionnan comercial y for di perspectiva socio-sanitario, e ta peligroso.
Nan a señala cu faltando menos di 2 luna di e inicio previsto, ainda sector salud no conoce e detayenan di e implementacion aki. Den e caso di contribucion propio, e recoleccion mester wordo realisa pa e proveedor di cuido. “Nos ta declara na prome luga cu nos ta unanimamente den desacuerdo cu e cambionan riba mesa. Na segundo luga nos ta introduci, cu si e cambionan ya caba lo ta implementa cuminsando dia 1 di april, e no ta posible pa tin na tur e luganan di cuido trahadonan bon capacita, sistemanan di caha, mashinnan di swipe, cahanan fuerte di seguridad y controlnan administrativo”, nan a indica.
“Cu keda cla cu e coleccion, si no obstante wordo introduci a pesar di nos obhecionnan, en todo caso no por pasa via e dunadornan di cuido. Pasobra no lo kier sigui contribui na un sistema di cuido medico stabiel, por lo tanto, a pesar di nos obhecionnan na e propuestanan di contribucion propio, y un serie di opcionnan prepara door di locual Gobierno y/of AZV por cobra contribucion propio por wordo organisa cu eficacia y eficiencia”, nan a agrega.
