Organisacionnan comercial kier claridad riba BTW

Organisacionnan comercial di Aruba Trade & Industry Association (ATIA), Aruba Hotel & Tourism Association (AHATA) y Camara di Comercio (KvK) ta haci un yamado na gobierno pa lo mas pronto posible duna un claridad riba e implementacion di BTW como reemplaso di e actual omzetbelasting BBO.

Nan ta trece dilanti cu companianan mester sa na tempo pa asina por adapta nan sistemanan administrativo, segun un relato di portal noticiero aruba.nu.

Presidente di KvK, Omar Tromp a enfatisa despues di un reunion cu e ministernan concerni cu ainda no a tuma un decision, sino cu esaki lo mester sucede pa fin di e siman aki. Maske Camara di Comercio ta na fabor di un otro forma di omzetbelasting, e organisacion ta adverti riba e consecuencianan si e negoshinan no haya suficiente tempo pa por prepara pa un sistema nobo.

Director di ATIA, Herrick Henriquez a bisa cu e reforma fiscal ta forma parti di e landspakket 2022, riba cual mester tuma un decision pa fin di e siman aki. Segun aruba.nu, e ta haya absurdo cu ya desde 2020 ta bin ta papia di reforma fiscal, y cu e organisacionnan comercial awo un siman prome cu e decision ta haya algo di tende, sin haya e chens pa duna comentario riba esaki. Si e ta aprecia cu gobierno a laga sa cu te na januari ta bay prepara tur e detayenan y cu e organisacionnan comercial por duna nan opinion riba esey. Pero toch e tambe ta adverti riba e consecuencianan si e companianan mester haci adaptacion na nan sistemanan na ultimo momento.

For di sector turistico a reacciona director di AHATA, Tisa LaSorte di forma positivo riba e plannan pa implementacion di BTW. El a referi na BTW como un sistema mas simple di omzetbelasting cu ta contribui na crea un division balansa di e pesonan fiscal riba tur compania. LaSorte a enfatisa cu no ta e intencion cu gobierno, cu ayudo di BTW, ta aumenta su entrada y di e manera aki ta laga atras e reduccionnan di gasto cu ta asina necesario. E tambe a insisti riba e necesidad di informacion completo y na tempo, pa asina e comunidad comercial por prepara su mes na tempo pa e cambionan.