Riba diasabra atardi Greg Peterson di organisacion ambiental Aruba Birdlife Conservation a bati alarma riba Facebook pasobra excavacion cu mashin di contruccion a wordo haci den area di saliña na Malmok pa prepara pa evento Funstacle Masters. Sr. Peterson riba su post a haya esaki un abuso mirando cu e area aki lo ta un di e 16 areanan designa pa wordo protegi y bira parti di Parke Arikok.

Sr. Peterson tabatin argumento cu areanan di saliña ta hopi delicado y a cuestiona si e organisado di e eventonan a tuma contacto cu Parke Arikok pa puntra si nan mag di haci nan evento den e area. Tambe el a enfatisa cu e area aki ta forma parti di patrimonio cultural importante pa loke ta trata arkeologia riba nos isla.

Funstacle Masters ta un evento unda e participantenan ta haya un reto di ehercicio unda mester core y evadi obstaculonan. E participantenan mester core, subi structura, gatia den lodo y mas.

Abogado Lincoln Gomez kende ta representa Fundacion Preserva Malmok a manda un comunicado den direccion di e organisadonan di e evento y tambe no tabata di acuerdo cu e manera con e organisadonan a haci buraconan cu mashin di construccion den saliña. Sr. Gomez a uza e mesun argumentonan cu sr. Peterson pa loke ta trata e desacuerdo cu e manera con esaki a wordo haci. Pero na mes momento sr. Gomez a pidi pa stop excavacion y tambe pa no tene e evento riba e area di saliña.

Organisado ta haya cu mester a sinta hunto

Nos a yama Curt Croeze kende ta un di e organisadonan y el a conta nos cu e evento aki awo ta drentando den su di 6 edicion desde 2013 y cu desde e tempo ey nan ta haya permiso pa por tene e evento. Esaki ta e di 3 biaha cu nan ta tene e evento aki riba mesun luga.

Sinembargo sr. Gomez den su comunicado a splica cu aunke bo tin permiso pa tene un evento publico esaki no kiermen cu bo no por wordo toca pa un caso civil of criminal. E abogado a bisa cu nan lo tuma accion legal contra e evento y tambe patrocinadonan si e evento no wordo para.

E evento a sigui manera normal, aunke sr. Croeze a conta Bon Dia cu nan a stop coremento den saliña despues di a combersa cu polis cu a bay yuda pa cera caya. Pues e buraconan cu a wordo coba no a wordo uza. Na mes momento sr. Croeze a haya e manera con e keho a wordo haci sin profesionalismo, specificamente pasobra e ta bisa cu nan no a vocifera ningun preocupacion cu e organisadonan te na e ultimo dia. Tambe e manera con esaki a pasa riba Facebook sr. Croeze no ta di acuerdo cu ne. “Nos por a sinta na mesa manera hende grandi si nan lo acerca nos pero nan no a scoge pa haci esaki”.

E organisadonan lo combersa cu e organisacionnan ambiental segun nos a comprende for di sr. Croeze riba dialuna y diamars. Nos a purba haya comentario di parti di Marlon Croes director di DOW pa loke ta trata DOW su bista riba e proteccion di areanan manera saliña di Malmok ora ta tene eventonan publico, pero sr. Croes no a contesta. Nos lo sigui desaroyo den e caso aki y mira si e organisacion ambiental lo bay corte. Nos no a logra haya comentario di con e organisacion lo bay tapa e buraconan bek. Tambe nos a purba haya comentario di sr. Gomez pero no a logra cu esaki.

Pregunta cu ta keda: si e area aki ta protegi dicon instancianan ta otorga permiso? Unda e sincronisacion entre e diferente departamentonan a keda?