Entrante awe y durante tres dia, Aruba ta sede di un seminario internacional organisa pa Organisacion Internacional di Derecho di Autor.
E apertura di e magno evento ta tuma luga awe mainta cu presencia den mas cu 400 delegado di diferente pais na Hilton Hotel. E seminario lo tin presencia di Sra. Maria del Pilar Troncoso Kende ta presidi e Asociacion Interamericana di Propiedad Intelectual.
Director di Oficina di Propiedad Intelectual di Aruba, Sr. Gos Oduber a declara na Bon Dia Aruba cu nan ta parti di e congreso cu ta enfoca specialmente riba productonan/ articulonan falsifica cu ta bin riba mercado na benta. E personanan presente na e seminario aki ta abarca esun cu ta trata riba tereno di marca, caminda nan ta bin hunto pa discuti e forma pa combati e fenomeno aki y bin cu posibel solucionnan na nan respectivo paisnan tanto di Latino America y paisnan grandi manera Merca y Inglatera.
“Pa nan trece ideanan dilanti con pa combati esaki. Y pa ofrece e consumidonan producto original y no productonan falsifica”, Sr. Oduber a bisa na e matutino aki.
El a laga sa cu e problematica di falsificacion ta un preocupacion na Aruba, pero tambe ta un preocupacion rond mundo pasobra tur caminda lamentablemente e productonan falsifica ta yega. Director di Oficina di Propiedad Intelectual di Aruba ta haya relevante pa e tipo di reunion aki ta tuma luga na Aruba. Nan sa cu riba nos tin diferente tiendanan cu ta promove e benta di articulonan falsifica. Pero di otro banda e tin cu bisa cu lamentablemente e consumido ta cumpra e tipo di articulo aki contribuyendo na algo cu no ta bon pa nos mes y pa mundo. Y banda di dje e producto cu bo ta haya no ta esun mas miho.
Instrumento legal
Sr. Oduber a indica cu no ta den tur pais tin leynan implementa cu ta trece solucion y cu ta yuda pa controla esaki. Pues den e seminario aki seguramente ideanan nobo lo bin riba mesa pa asina lo por bin cu leynan cu ta haci cu nan lo por tin instrumentonan legal pa elimina e tipo di productonan aki.
Un di e caracteristicanan di nan ta cu hopi di e productonan aki ta mustra cu ta di marcanan caro , pero nan ta wordo elabora di mala calidad, y logicamente esaki ta un engaño pa e consumido.
“Hopi biaha e pensamento tras di esaki ta cu esunnan cu ta pone e producto aki ariba caya ta organisacion terorista cu ta busca manera pa yega na placa”, el a bisa. Sr. Oduber a bisa cu e miedo cu realmente nan tin ta cu nos mes ta contribui financieramente na e organisacionnan aki.
Durante e seminario aki di cuater dia caminda alrededor di 400 hende cu a cuminsa yega Aruba fei fin di siman tras di lomba caba. E asociacion internacional aki tin varios aña di existencia, pero esaki ta e prome biaha cu nan ta organisa un evento riba nos isla. E ultimo seminario cu nan a organisa tabata na Cartagena, Colombia. E idea tras di e tipo di seminario aki ta cu e grupo ta sigui discuti regularmente tur e diferente topico riba e tereno di marca.
Segun Sr. Oduber, na Aruba tambe a yega turno pa discuti e tema aki den seno di e seminario contra falsificacion di productonan. Aunke e seminario aki ta envolvi mas tanto esunnan cu tin di haber cu marca. Ora cu e asunto aki ta bay mas leu caminda cierto solucion lo wordo implementa e ora ey nan tin pensa di envolvi otro sectornan pa delibera riba leynan cu ta necesario.
Finalmente Sr. Oduber a bisa cu e ta kere cu nos mester yega na un consenso pa conscientisa consumidonan pa no contribui na e tipo di articulonan aki.
