Dialuna ultimo, director general di Organisacion Internacional di Migracion (IOM), Julio Croci a ofrece un charla na La Casa del Venezolano, organisa door di Fundacion Venaruba Solidaria pa asina duna mas informacion tocante “Migracion Motor di Desaroyo”, enfoca riba e parti di e aporte cu migracion Venezolano ta haci na e comunidadnan cu ta ricibi esaki.

Croci, ken ta pertenece na oficina regional pa respuesta regional di e situacion di Venezuela – cual a wordo crea par di aña pasa pa traha cu 17 pais receptor di migracion Venezolano, den cual Aruba ta un di nan—a expresa cu nan a bin Aruba pa haci diferente actividad, por ehemplo, inaugura un laboratorio di informatica cu danki na e organisacion aki crea na Suisa, nan por a duna esaki como donacion na e Fundacion Venearuba Solidaria. Tambe pa reuni cu migrantenan entrepreneur y ademas haci un tayer di apoyo escolar pa muchanan migrante.

Di igual forma, el a splica cu den e charla “Migracion Motor di Desaroyo” tabatin asistencia di diferente migrantenan di varios nacionalidad, y a scucha nan. Tambe el a menciona cu el a reuni cu Gobierno di Aruba diamars ultimo riba e tema aki, na unda Croci sin duna mayor detaye na redactor di Bon Dia Aruba, a sigura cu e reunion a bay “hopi bon. IOM a reafirma e apoyo na Gobierno di Aruba den futuro politica migratorio.”

Tambe, el a informa tocante un reunion cu migrantenan cu ta doño di nan mesun negoshi of entrepreneur, comprendiendo e migracion como un motor di desaroyo, w aporte cu migracion tin pa e paisnan receptor. El a splica con IOM ta rescata den cada pais cu ta ricibi migracion Venezolano e parti con nan ta suma na e motor productivo apoyando cu trabao, cu consumo, aporte cultural, social y cientifico den cual Aruba no ta scapa di e realidad aki. “Nos a bin, entre otro cos, pa ilustra con e comunidad Venezolano ta na Aruba y kico nos por haci pa contribui na un miho desaroyo,” Croci a bisa.

El señala cu trahando den un oficina regional hunto cu 17 pais ta duna e posibilidad di conoce e realidad di hopi pais cu no ta scapa pa loke ta trata politica di migracion. Pero e problemanan na e cual migrantenan y refugiado ta enfrenta ta casi mesun cos den diferente pais, vooral den paisnan cu no tabata custuma di ricibi un cantidad grandi di migrante den poco tempo y cu ta genera cierto friccion of situacion cu dia pa dia mester traha riba dje, aportando dato y studionan. IOM conhuntamente cu otro agencianan di Nacionnan Uni, como Alto Comisionado di Nacionnan Uni pa Refugiadonan (UNHCR) , Unicef y otro agencia ta traha cu e respuesta regional pa e situacion di Venezuela.

“E datonan aki ta demostra cu migracion ta aporta, ta suma, migracion no ta bin kita trabao di niun hende. Al contrario, e ta bin pa genera trabao y oportunidadnan di desaroyo. P’esey mi ta kere cu for di IOM nos ta bay sigui aposta na e trabao di asociacion civil, manera ta e caso di Fundacion Venearuba Solidaria, cu ta haci un gran trabao pa henter e comunidad Venezolano y pa otro nacionalidadnan akinan na Aruba conhuntamente cu e poblacion local. Pero mi ta kere cu e miho manera di duna un mensahe ta pa compronde cu migracion ta un motor di desaroyo, y estudionan cu nos a haci ta verifica esey, cu mester kita e mirada negativo riba migracion pasobra no tin prueba cu migracion ta un carga pa estadonan,” Croci a comenta.

Den diferente estudio cu nan a haci den e region, Croci a menciona cu na Republica Dominicana a crea mas di 10.000 puesto di trabao den man di entrepreneur y empresanan chikito di migrantenan Venezolano. Di e puestonan di trabao aki, 8.000 a contrata trahadonan Dominicano: “loke ta nifica cu e beneficio no ta solamente pa e poblacion migrante Venezolano sino pa tur,”el a bisa.

Na Panama, inversion priva Venezolano a genera 50.000 puesto di trabao di e cual 40.000 di nan ta trahado Panameño.

Pero esaki no a sucede di un dia pa otro, manera Croci a sigura. E relacion y combersacionnan cu gobiernonan di e paisnan tambe ta importante pa asina nan por mira experiencianan di otro paisnan cu a bin di ta positivo den e proceso di regularisacion y di wak e importancia di migracion como un desaroyo y no como un carga: “ta situacionnan cu ta bay keda plantia y ta bay keda den combersacionnan unda IOM semper ta disponibel pa apoya e procesonan aki, comprondiendo cu cada estado ta soberano pa su politica di migracion. Pero IOM ta pa apoya tanto sociedad civil, comunidad migrante Venezolano y Estado di Aruba, na unda dialogo ta un miho manera pa yega na e acuerdonan aki,” el a señala.

Pa finalisa, el a trece dilanti cu e mesun paisnan aki cu ta receptor di migrante tambe nan tin su poblacion den exterior na unda migracion ta un movemento cu ta den historia di humanidad y cada biaha cu paisnan ta enfrenta un problema grandi como esun cu ta sucede na e momentonan aki di crisis climatico, den futuro, hopi poblacion ta bay wordo desplasa como consecuencia di e parti climatico aki unda e discurso di migracion ta bay ta hopi presente den agenda internacional.