E secretario general di e Organisacion di Estado Americano, Luis Almagro, a indica diamars pasa cu e organisacion a certifica e lista completo di preso politico na Venezuela. Cu esaki, OEA ta asumi e responsabilidad di atende e asunto cu gobierno Venezolano.
Mediante su cuenta na red social Twitter, Almagro a responde riba un tweet comparti pa Gonzalo Himiob, presidente di Foro Penal Venezolano, den cual el a señala cu actualmente tin 214 preso politico den man di gobierno di Nicolás Maduro.
Familiarnan y e partido Primero Justicia a exigi liberacion di Wilmer Azuaje, diputado na Conseho Legislativo di Barinas, cu a cumpli ocho luna den prizon.
Primero Justicia a emiti un comunicado den cual ta exigi na e organismonan competente libera e dirigente, debi cu por encarcela ningun persona pa pensa distinto y ta denuncia cerca e organismonan internacional e repitido violacionnan di husticia, di debido proceso y di derecho humano den e caso aki.
“E gobierno ta criminalisa esunnan cu ta su adversario; nos ta exigi e liberacion inmediato di diputado Wilmer Azuaje”, asina diputado Tomás Guanipa a declara. El a indica cu pa di tres biaha sigui a suspende e audiencia di Azuaje den corte y a exigi su liberacion.
Esposa di e parlamentario di estado Barinas tambe a pidi husticia den e caso: “Prohibi pa lubida, awe ta cumpli ocho luna di tin mi esposo, diputado Wilmer Azuaje, inhustamente preso.”
