Desde ayera nochi ta core basta rumor riba entre otro medionan social como tambe Whatsapp cu partido AVP no lo ta participando den e ‘Debate Politico Constructivo’ cu ta programa pa tuma luga mayan 13 di juli na Cas di Cultura. Segun e rumornan, esaki tin di haber cu e partido en cuestion lo kier a manda un otro candidato (posibelmente Gerlien Croes) cu no ta e lider pa forma parti di e debate ya cu esaki lo ta trata un “Millennials Edition”.

Bon Dia Aruba a tuma contacto cu un di e motornan tras di e asina yama Focus Group cu ta organisando e debate. Den un reaccion pa nos redaccion, Queenanne Bergen ta splica cu te na e momento aki nan no a haya nada oficial di partido AVP, indicando cu nan no lo participa mas na e debate. “Te na e momento aki nos tin tur cos programa pa e diez (10) partidonan participa cu nan lider”, sra. Bergen ta bisa.

A puntra sra. Bergen si na algun momento e partido a indica cu nan kier cambia e candidato cu lo representa nan, y e ta splica cu mas o menos 1 siman pasa e la ricibi un yamada cu e peticion pero a splica bon cla e motibo(nan) pa kico no por acepta e cambio aki. “Esaki no ta e plan. Nos a approach tur lijsttrekker from day 1, cual ta lunanan atras y nos nunca a desvia di e formato ey.” Sra. Bergen ta splica cu tur partido a confirma cu nan lo ta participando y cada un cu nan lider. E ta splica tambe cu tin mas partido cu a pidi pa haci cambio di candidato pero a splicanan claramente cu esaki no ta posibel y cu e motibonan dicon.

Millennials Edition
E debate politico aki ta ser yama ‘Millennials Edition’. Bon Dia Aruba a puntra sra. Bergen kico ta e proposito tras di esaki, mirando cu tin varios pregunta ta wordo lansa di e motibo dicon no ta permiti otro candidatonan participa cu kisas ta mas enfoca riba e grupo yama millennials. “Nos idea ta pa informa y educa e millennialnan; pa nan ta den e publico, pa nan ta tras di television y riba social media paso nos a haci encuesta bou di millennials dus tur nos preguntanan ta bin di e problemanan, precupacion y punto di bista cu ta concerni e milliennialnan. P’esey nos ta yam’e ‘Millennials Edition'”, e ta bisa. Segun sra. Bergen ta sigui splica, e focus ta pa e millennialnan por ta conciente ora nan bay vota dia 22 di september.

“E lidernan ta esunnan cu tin mas informacion di e contenido, e plan, vision y ideologia”, sra. Bergen ta splica.  E organisador ta pone enfasis cu e contenido cu nan escoge ta pa e lidernan. “Corda bon cu ta un di nan lo bay guia e pais y no un otro candidato dus pesey e ta hopi importante pa tende e cosnan for di nan punto di bista”.

AVP
For di e campo di sostenedonan di e partido por wak basta comocion riba e asunto aki. Nan ta uzando e argumento cu e debate ta pa millennials pero no kier laga un candidato cu ta representa millennials forma parti di e debate. Di informacion cu nos redaccion a ricibi, lo tin un reuda di prensa for di e partido riba e tema aki pero esaki ainda no ta confirma. Durante di dia nos lo ta buscando contacto cu e partido y/of minister Mike Eman pa un reaccion riba e rumornan aki.