Un grupo di Venezolano residencia na Aruba ta organisando un caminata  humanitario yama Unidos Por Venezuela.  Esaki lo tuma luga diadomingo awor saliendo for di Plaza  Simon Bolivar.

Luisa Rincon kende ta un miembro di e grupo cu ta organisa e marcha aki ta informa Bon Dia Aruba: “E ta un caminata familiar y pacifica; e no tin nada di haber cu protesta. Nos intencion ta humanitario.”

E  meta di e marcha ta uno humanitario pa contribui cu e Cruz Berde cu ta un grupo di boluntario, mayoria di nan ta studiantenan di medicina cu ta brinda  asistencia y prome auxilio na esunnan cu a resulta herida den e marcha di protesta na Venezuela. Of tambe esunnan di mas necesidad cu no tin remedi of asistencia medico.  E ta reconoce cu pa organisa e caminata aki no ta nada facil; ya cu nan a haya cierto critica di algun sector di e Venezolanonan na Aruba.  Pero e apoyo cu nan ta bin hayando ta mas grandi cu esunnan cu ta critica nan.

Sra. Rincon a bisa cu nan a dicidi di compromete nan mes, ya cu mientras cu Venezuela su pueblo ta pasando den duro; akinan e ta sinti cu nan como Venezolano no ta haciendo practicamente nada pa yuda e hendenan aki. “Nos ta keda den concentracion so y nada mas.” E pregunta cu a surgi tabata: Kico nos por haci pa Venezuela?.  E ta haya cu si cada un di nan por duna un contribucion, e ta marca un diferencia caba.

El a bisa cu e Helm Berde na Venezuela ta feliz cu e noticia aki pasobra nan mester di ayudo y  remedi.  E necesidad di remedi ta grandi; te hasta e remedinan cu no a wordo uza y cu a pasa apenas un periodo cortico di vencemento nan ta uza nan. “Mi ta bisa e hendenan: Si bo tin remedi cu bo no ta uza mas, please duna mi nan.” Specialmente nan tin mester di antibiotica; pero no solamente ta remedi sino otro articulonan manera catuna, etc., pasobra e necesidad ta grandi.

Casonan lamentabel
Dos  echo lamentabel ta esun cu finalmente a pusha nan pa bin cu algo concreto. Ta asina cu un amiga di dje bibando na Aruba su unico yiu homber a wordo mata den e localidad di Los Teche na Venezuela. E tabata un hobencito apenas 19 aña cu a bira e prome victima for di cu e marcha a cuminsa  tres luna pasa. Awor e cifra no oficial di mortonan ta mas cu 80.

Otro caso cu el a conoce di cerca tabata di un amigo di su primo. Un dia ora cu e protesta tabata tumando luga riba Avenida Fuerzas Armadas na Maracaibo, e hoben Paul Moreno kende tabata studiante di Medicina y miembro di e Cruz Berde of Helm Berde a bira otro victima. E hoben a wordo mata ora cu el a sali pa yuda e hendenan herida den e marcha aki. El a traha duro y tabata cansa pa causa di e bomnan di gas lagrimogeno. Paul a sinta na cant’i caminda y un auto a bin dal’e. E no tabata un accidente casual, ya cu e  auto a pasa dos biaha riba dje.  Nan a hib’e pa un clinica pa purba di scapa su bida, pero nan no por haci nada p’e; entre otro pa falta di recursonan  medico. “E ta un caso hopi tristo pasobra tur e muchanan aki por ta nos yiunan”, el a bisa.  E ta kere cu actualmente  Venezuela ta pasando den un momento hopi dificil; y un forma pa colabora cu su pais for di exterior  ta mustrando nos solidaridad, apoyo y participacion na e caminata pacifico y humanitario aki

E echonan di e dos victimanan aki a haci cu un grupo a wordo lanta na Aruba pa colecta remedi cu no ta wordo uza mas pa yuda  e Cruz Berde  su trabou, ya cu nan no ta depende di e gobierno di Venezuela. “Nan ta depende di e colaboracion. Nan ta studiante di medicina di Universidad di Zulia.”  E idea inicial tabata pa yuda e Helm Berde Luz cu ta esun di Universidad di Zulia; pero mirando e necesidad grandi cu e mesun organisacion aki ta pasando den otro estadonan na Venezuela, nan a dicidi pa yuda nan tur.

Caminata
El a laga sa cu e fondo aki lo wordo maneha di forma transparente pa medio di un accounting. E ta hiba e cifranan di e placa y ayudo cu ta wordo recauda door di e caminata aki.  E caminata lo sali for di Plaza Simon Bolivar 4or y mey y na haltura di Banco di Caribe nan ta sigui cana riba Avenida Milo Croes te Pricesmart –Linear Park te  Plaza di Bolivar bek.