Organisacion: ‘Adoption Day tabata exitoso’

Diadomingo atardi a tuma luga e anticipando Adoption Day na Animal Health Veterinary Hospital. Segun e organisacion esaki tabata un atardi exitoso cu mas o menos 10 bestia adopta.

E dia aki a wordo plania pa asina yuda bestianan bandona of abusa pa haya un famia nobo. Asina aki diferente instancianan a trece algun di nan bestianan rescata pa asina publico por a bin bishita nan y cu speransa cu lo adopta un. Tur e bestianan tabata cla pa bay cas cu tur nan documentonan, tur ta vacuna y tambe sterilisa. Por  mira cu hopi hende a bin cu nan mesun bestianan pa conoce esunnan cu ta poni pa adopcion cual tambe ta hunga un rol importante pa sa si por bay cu nan cas.

E tabata un evento bon bishita. No solamente por a mira e bestianan pa wordo adopta pero tambe por a cumpra cuminda pa bestia y acesorionan di negoshinan local. Na final di dia nos a tuma contacto cu Juan Henao kende ta un veterinario na e clinica y a tuma parti tambe den e organisacion pa e evento.

Segun Sr. Henao, e dia tabata uno exitoso sin ningun contratiempo y a haya hopi bon reaccion for di e comunidad. Mas o menos 10 bestia entre pushi y cacho a wordo adopta pero ainda falta. Ta keda esunnan cu lo mester laga e bestia bishita nan hogar prome pa por determina si nan por wordo adopta. Esaki ta a base di e bestianan cu nan tin caba y tambe pa instancianan por mira si e cas ta uno adecua. “E number por zona tiki pero esaki sigur ta un logro pa cada un di e fundacionnan cu ta traha duro pa rescata y busca cas pa cada un di e bestianan aki segun sr. Henao.

Tur e fundacionnan cu tabata ariba programa pa asisti a yega manera cu a planea entre otro: Animal Shelter, New Life for Paws, Crioyo Trappers, Animal rights Aruba, Bestial. Semper por bay bek ariba e Facebook di cada un di e fundacionnan menciona pa sea yuda cu algun fondo y tambe bo por mira cada bestia cu nan tin cu falta pa wordo adopta, sr. Henao ta bisa.

Tin plannan pa bolbe organisa un otro Adoption Day y esaki lo ta pa otro aña, e ta anuncia. “Esaki sigur ta algo pa sigui haci ya cu a mira bon reaccion e prome biaha y ta hopi contento di a mira cu hopi di e bestianan a logra haya un hogar y famia nobo.”