Fundacion pa Hende Muhe den Dificultad un biaha mas hunto cu partnernan ta uni pa bin cu e campaña di Orange Aruba. Esaki ta un campaña di conscientisacion riba violencia/abuso domestico cu a inicia aña pasa y awor lo bira anual pa via di su exito.

Ayera nos a publica algo caba riba e topico aki. E organisacion a elabora mas ayera den un conferencia di prensa.

Suzette Kock, presidente di Fundacion pa Hende Muhe den Dificultad, y presidente di e Orange Committee ta esunnan encarga pa planea henter e evento aki.  Miembronan di e Orange Committee ta representante di Arubaanse Padvindsters Gilde (APG) Grace Maduro,  coordinador di Fhmd Magaly Maduro, y Erika Chemaly (APG). Aña pasa Fundacion pa Hende Muhe den Dificultad a lansa e Orange Campaign pa prome biaha, cual ta: 16 dia di conscientisacion continuo contra violencia domestico contra mucha muhe y hende muhe na Aruba.  E tabata asina un exito cu a dicidi di haci esaki algo anual segun sra. Kock. E ta cuminsa dia 25 di november – dia internacional contra violencia contra hende y mucha muhe – y caba dia 10 di december, cu ta dia internacional di derechonan humano.

Caminata solemne contra violencia domestico
E aña aki segun sra. Kock, kier haci algo diferente y cuminsa cu un caminata soleme. E Multi Disciplinaire  Interventie Team di fundacion a dicidi cu mester demostra cu nan ta di luto.  “Di luto pasobra derechonan di victimanan di abuso domestico, sea muhe, homber , mucha of hende grandi ta wordo trapa,” sra. Kock ta bisa. Pues ta bay cuminsa cu un caminata cu lo inicia mey anochi, dia 24 pa 25. Ta invita tur esnan cu kier bin cana pa bin bisti na preto.  Ta bay cuminsa dilanti corte di husticia y cana direccion pa parlamento. “Ta nos deseo pa tin presidente di parlamento eynan presente pa acepta un manifiesto cu lo nos entrega den nomber di tur victimanan di violencia domestico.” Despues di e caminata aki, riba dia 25 parti atardi ta bay tin e apertura oficial di Orange via Facebook Live. Esaki lo inicia 7’or conhuntamente cu exposicionnan di obra cu tin di haber cu violencia, sea prome, durante of despues. Aña pasa nan tabata tin un proyecto cu un exito enorme tambe cu nan no a spera, e Orange Day Underwear, cual lo cuminsa bek tambe e mesun dia. Esaki tabata algo caminda cu comerciantenan tabata ofrece cierto descuento ora cu bo cumpra un paña interior y duna esaki na e fundacion. “Hopi hende ta lubida cu ora un dama drenta un shelter den un situacion di crisis, e ta bin cu e paña cu e tin bisti y nada mas.”

Congreso den Reino
Locual cu ta algo diferente e aña aki pa nan ta cu nan a dicidi di organisa un congreso den Reino Hulandes riba e topico di violencia domestico. A yega na esaki pasobra cu mester a tuma luga un congreso di Reino na St. Maarten dia 28/29 di november. Pero mester a cancela esaki debi na e efectonan di e horcan. E fundacion ta di opinion cu nan tin dos aña wardando pa un congreso asina tuma luga. Y nan no kier a perde e ‘momentum’.
E horcan na st. Maarten a demostra un biaha mas con vunerabel victimanan di violencia domestico en realidad ta segun e fundacion. No ta solamente cu nan tabata victima den un shelter, pero despues di e horcan nan no tabata tin caminda pa aloca nan mes.

“E prioridadnan aki ta asina importante pa nos a yega na un congreso asina y nos ta hopi contento pa e ayudo di APG cu a duna di nan parti pa asina eynan conhuntamente logra e congreso aki di Reino.” Esaki lo hiba cu ne tambe oradornan cu lo bini di afo pa asina engrandece  e topico mas hopi.

E ta wordo sigui pa dos dia di simposio cu lo tin tayer y lo ta mas activo segun e fundacion.  Pa mas informacion riba e congreso, simposio, presentacion y otro programa (Teen Dating Violence Program), por tuma contacto cu e fundacion riba number di telefon 583 5400.