Awe dia 21 di september e Organisacion Cultural, Educacional y Cientifico di Nacionnan Uni (Unesco) ta considera dia internacional di paz. Riba e dia aki Unesco ta curasha pueblo pa tuma tempo pa refleha riba paz na nivel mundial y con por yega na esaki di un manera sostenibel. Na Aruba siguramente awor den temporada di eleccion, e comite nacional ta bisa.
E comision nacional di Unesco na Aruba ta organisa un accion awe tardi 6or na Plaza Turismo pa conmemora e dia.
E tema di aña 2017 ta pa bin hunto pa paz cu respet, siguridad y dignidad pa un y tur. Director General di Unesco Irina Bokova ta subraya e importancia di un dia manera esaki unda por refleha riba paz. Specialmente den presente unda ‘forsanan nobo di division a bin dilanti cu kier promove intolerancia y odio’. Cu esaki sra. Bokova kiermen cu ‘terrorismo ta promove violencia, mientras extremismo violento kier venena e mente di hobennan y esunnan vulnerabel’. Na mes momento, sra. Bokova ta expresa cu ‘den e paisnan unda pobresa ta reina, desaster natural ta raza comunidadnan cu ya caba ta vulnerabel y ta hisa e riesgo di violencia’.
Pa yega na un solucion pa e problemanan mundial aki, Unesco kier promove mas colaboracion entre nacionnan. Ya cu nan ta argumenta cu no ta un nacion so por enfrenta e problemanan.
“Riba e dia internacional di paz aki nos tur mester renoba nos compromiso pa solidaridad global. Pa sostene paz nos mester traha riba esaki tur dia, den tur sociedad, cu tur homber y muhe. Pa medio di traha hunto nos por yega na un miho futuro en comun pa tur”, segun nan.
Desaroyo sostenibel di paz
Secretaria General di comision nacional di Unesco na Aruba Zetsia Ponson ta conta Bon Dia cu awe nan ta organisa conhuntamente cu JCI Foundation un accion pa honra e dia aki na Plaza Turismo. “JCI mescos cu Unesco su meta final ta pa enfoca riba paz mundial. Pa yega na un sustainable peace, Nacionnan Uni a crea e Sustainable Development Goals (SDGs)”.
Sra. Ponson ta splica cu e SDGs delinea pa Nacionnan Uni ta metanan specifico den diferente area, manera medio ambiente, pobresa, percura pa tin cuminda na un pais, etc. E ta dificil pa splica cada SDG individualmente pasobra tur tin enlace cu otro. Por ehempel si bo percura pa bo awanan ta sano, e bida marino ta saludabel, pues bo tin cuminda y bebida sano. Esaki tin efecto riba nos bida diario, e ta splica.
Unesco na Aruba ta invita pueblo pa tuma tempo awe pa refleha riba e estado actual di paz na mundo. “Specialmente den temporada di eleccion ora tin emocion halto y tension den comunidad mi ta kere para keto y refleha un rato ta importante.”
