No tur dia ni tur aña nos tin un ministro ta bandona su puesto voluntariamente, y sigur no pa motibo di salud. Nos por a observa e cambionan fisico cu e mandatario a sufri, y sin bay den detaye nos por imagina cu e retonan riba e tereno aki ta grandi. Cu su salida ta bay un di e personanan mas marcante y controversial alavez di ultimo decadanan. Conoci pa su postura fuerte, den sentido fisico y figurativo. Esey semper a percura pa hopi dinamismo unda cu e ta, y a trece semper hopi controversia tambe, te na ultimo. E ultimo obstaculo cu e tabatin pa tuma prome cu el a renuncia a resulta di ta uno dificil pa vence. Nos ta comprende cu e asunto aki, e decision clave riba tereno di maneho di desperdicio, a keda posterga te otro aña, pero ken cu ta bay t’ey como mandatario, e tema ta sigui mescos, y e contradiccionnan tambe.

Ultimamente e tabatin exito tambe, logrando e ‘groundbreaking’ pa e hotel na Sero Colorado. Nos corant mes ta un di esunnan cu a critica cierto aspecto di e proyecto aki, sin cu nos ta perde di vista cu algo mester sucede pa reactiva economia di San Nicolas. Pa demasiado tempo e zona aki a keda subsisti sin un maneho cla cu tabata encera un plan coherente di desaroyo socio-economico a largo plazo, cu por tabata e base pa un cambio structural y pa varios decada pa San Nicolas. Desde tempo cu e mandatario aki tabata forma parti di e gabinete anterior, e contradiccionnan interno den esaki a sali na luz di dia. Su coleganan tabata bay ciegamente tras di e prome ministro y e ministro encarga cu energia den nan afan pa logra reapertura di e refineria. E logro di impone e farsa di e aventura cu Citgo, cu cual nos ta lidiando awe ainda, a haci cu e prome intento pa trece un hotel grandi na Sero Colorado a fracasa, pasobra e inversionista ey no a mira como algo realistico pa inverti miyones den sombra di un refineria den operacion. Y no cualkier refineria, sino uno sin reglanan ambiental, unda ademas den e contract cu Citgo/Pdvsa a crea e base atrobe pa sigui opera sin legislacion ambiental, y si acaso nos, Aruba, ta desea di bin cu regla ambiental anto nos mester carga e gastonan di e adaptacion cu e compania lo mester haci pa por cumpli…

En todo caso, e soño ‘color de rosa’ di e refineria a gana momentaneamente, te cu a cuminsa bira mas y mas cla cu e aventura aki no ta bay niun caminda. Claro cu tin hende cu ta keda kere den e soño, nan tin derecho di nan opinion, pa mas cu esaki ta parce algo imposible na e altura aki. Pero esey ta un tema cu nos a cubri ampliamente durante e ultimo añanan. Loke nos kier bisa awor ta algo cu nos a trece dilanti na 2016 caba, tempo cu e proyecto di e refineria a vence. Esey ta cu e refineria tabata stroba un desaroyo sano di e ciudad San Nicolas. Y na e momento ey e mandatario aki tabata e unico cu no tabata preocupa solamente pa Sero Colorado, pero tabata traha riba un plan di rehabilitacion di San Nicolas mes. Anto esey na un momento cu su copartidarionan tabata enfoca solamente riba un farsa hunto cu e peor escoria di e continente aki, nos bisiñanan Chavista. Ata nos ta deal awe ainda cu consecuencia di esey. En todo caso, e merito di a pensa mas leu e tempo ey, ningun hende por kita di e mandatario aki, pero manera semper, no tur bataya ta di gana.

Esey no ta implica cu automaticamente nos tabata, y ta di acuerdo cu tur aspecto di e rumbo cu e desaroyo na San Nicolas a tuma. A surgi e tema di partnernan dudoso, unda nos a cuestiona esaki, cu prueba y argumento, y lo keda haci esey tambe. Y, manera treci dilanti mas biaha, casi mil camber pariba, ademas di e miles di camber cu a permiti na parti pabao di nos isla caba, ta hinca nos den un futuro bastante dificil. Cu ta geel o ta berde, o otro color a percura pa e problema aki, nos lo mester enfrenta esey na su debido tempo.

Awor, pakico ta importante pa nos pa trece e sucesonan alrededor di San Nicolas dilanti, y e papel cu el a hunga den esey? Tin hopi otro tereno unda tambe el a opera cu nos por trece aden. Por ehemplo su logronan den turismo, pa menciona algo? Nos no ta sinti nos yama pa haci un recuento di tur loke el a haci, sino enfoca riba algo cu pa nos ta un tema cu no ta desaparece cu e ministro aki, pero unda el a demostra di mira loke hopi hende no ta mira ainda… Manera nos a yega di bisa na varios ocasion: tur gobierno tin e sagrado deber di hiba e partinan di su pais, cu a cay atras economicamente, na e miho nivel di e pais en total. Si 40 aña pasa nos mandatarionan a comprende esey, nos tabata hopi mas leu awe. E mandatario aki a comprende, y esey nos ta comparti.