Despues cu hobencita di 14 aña Eugelisa Martis a huy for di cas riba diasabra anochi rond di 7 or, mama di e mucha a bati alarma na autoridadnan. E mama ta haci un yamada na comunidad y cualkier persona cu lo tin e mucha scondi of cu sa unda e lo ta pa e por bin cas bek. E mucha den pasado a sufri di trauma y a bati porta na diferente instancia cu a nenga di yuda.

Lisette Gomes di e fundacion cu ta contra abuso di mucha a yama prensa urgentemente pa asina e mama kende sra. Gomes conoce di algun tempo wordo reuni cu su yiu. E mama tin sospecho cu e hobencita lo por ta na peliger pa haci algo grave cu su bida pero tambe lo por ta peligroso pa otronan.

Esaki segun e mama pasobra su yiu ta sufri di depresion y a yega di corta su mes den pasado.

Pues e ta pidi pa cualkier persona cu lo tin e mucha of lo sa unda e lo ta pa plis yama tipline di polis 11411 of si no kier haya problema cu husticia por yama e mama mes. Sinembargo e mama ta señala si e mucha no wordo entrega boluntariamente lo cana caminda di husticia pa persigui esnan responsabel.

Sra. Gomes di e fundacion a splica cu e mucha di 14 aña lo mester a bay Boneiro pa haya tratamento psikiatrico. Esaki segun e mama lo a ta un di e rasonnan cu e mucha a dicidi di huy specialmente pasobra e mucha mes ta bisa mama cu e ta ok cu bay Boneiro mientras amiganan ta bisa e mama cu e no kier. Tur esaki mientras den pasado el a yega di huy varios biaha caba. “Nos a papia ya caba cu instancianan na Boneiro y nan ta hopi habri pa yuda nos. Esaki despues di cana caminda di cruz pa haya ayudo na Aruba, cual no a duna fruto.”

Instancia na Boneiro ta sorprendi cu e mucha no a haya cuido na Aruba segun mama

Te hasta e mama a remarca cu nan contactonan na Boneiro a expresa nan sorpresa pa e manera con no por a haya cuido adecua pa e mucha riba Aruba. Sra. Gomes a bisa cu e ta na altura cu gobierno ta trahando riba un plan di emergencia pa trata e crisis social cu ta andando na nos pais pero cu ‘esey no ta kita cu casonan y abuso ainda ta sosode’. En particular sra. Gomes a splica cu nan te hasta tin rapportnan unda cu e mucha ta padece di tin sintomanan di depresion, hunto cu problema pa concentra y problema pa come.

Sra. Gomes a hunto cu e mama di e mucha a tuma nota di varios comentario negativo tira den direccion di e mucha despues cu polis a publica e anuncia pidiendo comunidad cooperacion pa haya e mucha. E di cu ‘hopi biaha ta wordo critica sin sa cu tin un rason tras di e suceso’.

Si lo tin algun indicacion cu ken e yiu lo ta e mama no por splica. Sinembargo riba 5 di september a haci denuncia contra un homber di 27 aña ‘pedofiel’ segun e mama cu lo a interactua cu e hobencita. Pero actualmente no tin indicacion cu e persona aki lo ta cu e hobencita pa via di ‘indicacionnan riba medionan social y otro desaroyonan cu nos ta mira’.

E mucha muhe a sufri di un trauma mas o menos 7 aña pasa y a cana tur e camindanan pa por haya ayudo. Pero Ministerio Publico a bisa den un carta cu e caso no por bay dilanti pasobra no por comproba cu algo a tuma luga. Esaki mientras segun e mama tabatin rapportnan di dokter y e mucha su denuncia na polis. E mama no kier a bay mucho den detaye kico a causa e trauma. “Tur es tempo mi yiu ta acusa mi di nunca a yud’e. Esey ta e problema cu tin ora husticia no ta para na bo banda y bo yiu ta perde confiansa den su mesun mayor.”

Un bes mas e mama cu lagrima na wowo a pidi comunidad su ayudo pa haya e mucha.

Nos lo tuma contacto cu OM pa haya sa dicon exactamente no por a trece e caso di trauma dilanti corte.