“Nan ta bisa cu nan a haci diferente estudionan, pero bo tin e otro banda di medaya di e ambientalistanan cu ta bisa cu nan si ta bay haci daño[na Isla di Oro].

Ultimamente por a tuma nota cu tabatin diferente organisacionnan ambiental cu a manifesta contra e proyecto yama Zoëtry, entre otro Aruban Warriors, Accion Ambiental y Aruba Birdlife Conservation.

Sinembargo, den e proceso pa haya aprobacion di NGOs e gobierno anterior a ricibi un OK di parti di nan, mientras awo tin organisacionnan cu ta contra e desaroyo aki. No ta conoci actualmente si e mesun organisacionnan aki tabata parti di e consultanan haci 2 aña pasa pa tene na cuenta e puntonan di comunidad por medio di e NGOs.

Cambio di ROP lo tarda 1 pa 2 aña
Riba e punto aki nos a puntra minister di turismo, salubridad y deporte Dangui Oduber (MEP). E minister a splica cu e proyecto aki ‘riba su mes ta algo nobo’.

E aspecto nobo aki den cual e minister y su coleganan a expresa di kier bay, mirando e intencion pa diversifica turismo na Aruba’ ta crea un oportunidad pa Aruba explora mercadonan nobo cu no tin hopi den Caribe. P’esey nos ta sostene e idea en general di un tal proyecto’.

Sinembargo e minister ta reconoce cu un discusion a surgi pa loke ta trata e conservacion di e mangelnan y tambe e suela maritimo. “Esaki ta discusionnan cu ta andando.”
Manera e minister a indica den pasado, e ehecucion di e proyecto aki na Isla di Oro y e mangelnan cu ta rondon’e ta mara na cambionan den e plan di desaroyo teritorial (Ruimtelijk Ontwikkelingsplan).

E cambio necesario den e ROP pa haci e proyecto aki posibel, sinembargo, ‘lo por tarda 1 pa 2 aña ainda’. E proceso pa cambia esaki mientrastanto ta andando caba segun minister.
“Mi no sa si e desaroyadonan aki ta dispuesto pa warda 1 pa 2 aña mas, pasobra nan tin 4 aña caba ocupa pa realisa e proyecto aki.”

Den un entrevista cu matutino NoticiaCla, un di e desaroyadonan Franz Sydow despues di e manifestacion a expresa cu e lo ta dispuesto pa warda cuanto tempo cu ta necesario.

‘Si yega asina leu nos mester haci un sondeo independiente’
Riba e aspecto di desaroyo en general, e minister a expresa cu nan ta tene cuenta cu tur personanan cu ta protesta y alabes tur e NGOs, ‘pasobra nos ta consciente cu tin cierto resistencia den comunidad cu no kier mira mas desaroyo, pero nos mester ta cauteloso pa bisa no na tur desaroyo pasobra refineria tur hende sa no lo bay bira nada. Pues turismo so nos tin’.

“Manera mi a bisa na parlamento, bo kier desaroyo pero desaroyonan exclusivo, upscale y hopi chikito y limita cu no tin asina hopi impacto riba comunidad. Por ehempel si bo bin cu 30 bungalow. Mi no sa cua ta e cantidad specifico cu nan ta papia di dje na Isla di Oro actualmente pero tabata papia di 30 bungalow, el a bay 60 y el a bay 120. Mi ta kere cu cambionan asina como gobierno bo no por tuma decision. Si ta 30 of 60 bo por biba cu esaki pero si ta 120 ya caba ta bira un otro cuestion.”

Manera nos a publica den pasado, tin organisacionnan y personanan cu ta bisa cu pa bin cu cualkier desaroyo na unda e mangelnan di Isla di Oro ta situa lo tin cu bin cu destruccion definitivo, ni maske con chikito e desaroyo ta encera.

Riba esaki e minister a reacciona bisando cu ‘e ta un tema complica pasobra bo kier preserva bo naturalesa y bo kier cuida e naturalesa. Pasobra e ta traha di tal manera cu un bes un daño wordo haci na dje, e ta dificil pa repara e daño’.

P’esey e minister y otro gobernantenan a sinta cu e inversionista cu ta bisa cu nan no lo bay haci ningun daño ambiental. “Nan ta bisa cu nan a haci diferente estudionan, pero bo tin e otro banda di medaya di e ambientalistanan cu ta bisa cu nan si ta bay haci daño. Pues nos como gobierno a bisa cu nos ta bay wak con lo bay cu e cambionan den ROP y si en caso cu e gruponan ta interesa ainda na e momentonan ey, nos tin cu bay sinta na mesa cu inversionistanan y partnernan y NGOs pa haci un sondeo imparcial y wak kico ta e conclusion y resultado di e sondeo.”

Potret di manifestacion na Isla di Oro haya por medio di pagina di Facebook di Aruban Warriors