No ta nos custumber pa reacciona directamente riba un articulo cu ta refleha e opinion di un persona. Mas tanto nos ta opina na un nivel mas general, unda asunto (‘zaken’) ta mas importante cu persona individual. Sin embargo, nos ta haci un excepcion pa bay den detaye riba un entrevista cu a aparece den nos propio Bon Dia Aruba ayera. Ta trata di e entrevista cu e ex-ministro encarga cu energia di e gabinete anterior.
Den e entrevista e ta opina riba e reciente caso di retiro di director di Utilities Aruba NV, unda e ta señala cierto aspecto di e caso cu na su parecer no a bay manera mester ta. No solamente e tin pleno derecho di vocifera su opinion, pero nos semper lo brinda espacio tambe pa opina, mmanera ta e caso aki. Sin embargo,esey ta laga e libertad na nos tambe pa reaciona riba esaki, no pa defende hende, pero si pa pone e discusion den e cuadro cu ta coresponde.
Nos motibo principal pa reacciona ta cu ora un persona ta critica, supuestamente e ta condena en general e malo cu e ta señala, hasta y tambe si e mes a yega di actua di e mesun manera. Y den e caso aki, lamentablemente nos mester señala cu e ex-ministro a yega di actua di igual manera den caso di despido di un director di un empresa estatal, comparable cu loke ta sucediendo awor den e caso reciente di e director di Utilities Aruba NV.
E ex-mandatario ta indica cu den e caso reciente di Utilities, lo a haci un investigacion y a base di esaki lo a kita e director di trabao, pero e persona mes no a haya un copia di e resultado di e investigacion pa defende su mes. Nos no sa si ta asina e asunto a bay, pero si esey ta e caso, anto esey no ta bon. Mester semper cana e caminda corecto den e asuntonan aki, esey no ta nada mas ni nada menos cu cumpli cu e normanan di bon gobernacion cu ta conta pa sector priva tambe. Y den e caso di un empresa estatal, unda finalmente e accionista unico ta gobierno como representante di e pais, nos por hasta bisa cu ta necesario pa duna un ehemplo den esaki.
Sin embargo, ta net den e periodo di gobernacion di e ex-mandatario aki a tuma lugar e retiro algun aña pasa di e director di WEB Aruba NV e tempo ey, di cual nos a publica un analisis extenso, trata dos biaha den corte. E violacion di e normanan di bon gobernacion cu awe e ex-ministro ta reclama, den defensa di e director di Utilities, ta exactamente esunnan pa cual e tabata responsable un par di aña atras. No a duna, manera comproba pa Corte di Husticia, e persona en cuestion un oportunidad pa defende su mes debidamente. A kita e persona sin mas, y ta te despues, dilanti hues, a trata na motiva e retiro. E carta di retiro no tabata contene ningun referencia na e motibo di e retiro. A bin resulta cu tabata haya cu e director no tabata comunica y colabora bon den e compania y dentro di e consorcio. Esey por ta e sentimento na nivel di gerencia, y por ta legitimo, pero ta bay pa con ta atende e asunto.
Ora accionista y hunta di comisario, en general, no tin confiansa mas den un director, hues no ta bay cuestiona esey y no ta bay evalua si tin un base pa e falta di confiansa cu na dado momento a surgi. Ta considera e decision di e asamblea di accionista como un acto soberano cu cual hues no ta bay mishi.
Pero, den e sentencia Corte ta remarca cu como bon dunador di trabao e compania mester a atene su mes na e exigencianan di cautela (zorgvuldigheidseisen) den e trato di e director den e asunto aki. Corte ta constata:”Het Hof stelt vast dat uit geen enkel document blijkt dat de feiten en omstandigheden die WEB in deze procedure ten grondslag heeft gelegd aan het gestelde gebrek aan vertrouwen in B. als directeur, bij de totstandkoming van het ontslag van B. aan de orde zijn geweest.” Nos a laga e parti aki sin traduci pa no tilda nos di traduccion ‘conveniente.’
Pa recapitula, no ta bay pa loke un asamblea di accionista por o no por haci; ta bay pa e manera con. E ex-mandatario tin rason ora e ta bisa cu un director mester por tin e garantia cu un politico no por bin di un dia pa otro kit’e di trabao. Nos no sa si den e caso di e retiro di e director di Utilities e asamblea di accionista y e hunta di comisario a actua corecto o no, esey lo bin dilanti den un eventual caso den corte, si e asunto yega asina leu. Loke nos ta constata aki ta cu e ex-mandatario ta trece dilanti critica riba asuntonan, unda e mes y otro nivelnan den e compania bao su responsabilidad no a actua corecto. Ta di spera cu e erornan ey no a ripiti den e caso actual.
