Banco Central di Aruba (BCA) a conclui e encuesta di percepcion di negoshi pa e di prome trimester di 2024. E encuesta di percepcion di negoshi ta evalua e percepcion economico di e negoshinan local.

Durante e di prome trimester di 2024, e asina yama ‘Business Perception Index’, cu ta consisti di e indicenan di condicion economico actual y condicion economico a corto plaso, a baha for di 106,9 den e trimester anterior te na 106,7 (mira Grafiek 1). E resultado ta debi na un bahada den e indice di condicion economico actual, cual a wordo mitiga pa un crecemento den e indice di condicion economico a corto plazo.

E indice di condicion economico actual a baha cu 1,6 punto di indice te na 105,2, compara cu 106,8 den e di cuater trimester di 2023. E indice di condicion economico a corto plazo a crece te na 108,8 den e di prome trimester di 2024 (Grafiek 2).

Den termino di expectativa relata na crecemento economico como 56,4 porciento di negoshi encuesta ta anticipa un crecemento economico positivo den e siguiente 12 luna. Esaki ta un bahada di 2,7 punto di porcentahe compara cu e trimester anterior. E porcentahe di negoshi encuesta cu ta anticipa un crecemento economico negativo a crece cu 3,1 punto di porcentahe te na 7,7 porciento, mientras cu e porcentahe di negoshi encuesta cu ta premira un crecemento economico flat a baha cu 0,5 punto di porcentahe (Grafiek 3).

 

E relato completo di e encuesta di percepcion di negoshi ta disponibel ariba website di BCA www.cbaruba.org

Tocante Banco Central di Aruba

E proposito principal di Banco Central di Aruba (BCA) ta pa contribui na stabilidad financiero y prosperidad economico di comunidad di Aruba. BCA ta logra e mision aki door di implementa un maneho monetario efectivo dirigi na mantene stabilidad di balor di e florin, promove e solides y integridad di e sistema financiero y yuda mantene un sistema di pago eficiente y confiabel.

Banda di su tareanan principal, BCA ta encarga cu emision di biyete di florin y moneda di florin y ta e bankero di gobierno. Ademas e ta regula e transaccionnan di pago cu exterior y ta administra e divisanan di Aruba y ta controla e uso di esaki.

Pa mas informacion tocante Banco Central di Aruba, por bishita su website www.cbaruba.org