(TMZ) – Oprah ta preparando pa papia tocante un topico grandi na Merca den su special di television binidero, pues ta trata di e impacto cu pildonan pa perde peso ta teniendo riba sociedad y riba su persona.
E biyonario a bisa cu e lo atende e medicamentonan y nan relacion na e revolucion di perdida di peso den su special nobo di ABC Primetime titula “An Oprah Special: Shame, Blame and the Weight Loss Revolution cual lo lansa den algun siman.
Oprah su special ta bini solamente simannan despues cu el a retira for di WeightWatchers su directiva despues di un partnership di casi 10 aña, lagando e compania di perdida di peso atras net ora cu el a cuminsa ricibi critica despues di revela cu e ta usa medicamento pa perdida di peso. Aña pasa, TMZ a reporta cu Oprah a perde peso cu e ayudo di medicamento receta pa dokter, aunke nunca el a revela e nomber di e medicamento aki.
E hecho cu Oprah ta haci uso di medicamento pa perdida di peso ta pa motibo cu anteriormente el a categorisa medicamentonan manera Ozempic y Mounjaro como un “caminda facil” sinembargo el a bira rond y cuminsa haci uso di esaki su mes, aunke no ta cla cua di e medicamentonan e ta usando.
Un special di television lo explora preguntanan y preocupacionnan tocante medicamentonan di perdida di peso y su uso, efectonan secundario ademas di su impacto riba hendenan cu ta biba cu obesidad y diabetes. Den un declaracion anunciando e special, Oprah ta bisa cu “e ta un topico hopi personal pami y e miyones di persona impacta rond di mundo cu tin añanan ta lucha cu obesidad y nan peso. E special aki lo trece hunto expertonan medico, lidernan den e espacio y personanan den e lucha diario pa papia tocante igualdad den salud y obesidad cu e intencion di combati e stigma y berguensa contra peso.”
