(AP)—Oppenheimer, un pelicula biografico di tres ora cu a bira extremamente popular, a ser corona como “best picture” na e di 96 Academy Awards cu a dobel como un coronacion pa Christopher Nolan.
Despues di a salta algun di e “auteurnan” mas grandi na Hollywood, e Oscars a duna Nolan shete premio pa su pelicula “blockbuster,” incluyendo pa categoria “best actor” pa Cillian Murphy, “best supporting actor” pa Robert Downey Jr. y “best director” pa Nolan.
Por medio di duna Oppenheimer e premio, e Academy of Motion Pictures Arts and Sciences a haci algo cu e no a haci pa mas cu un decada: duna su premio mas prestigioso na un pelicula cu a ser mira pa hopi y cu un presupuesto hopi halto. Den un industria di pelicula unda un capa, dinosaurio of Tom Cruise ta un rekisito pa un pelicula exitoso, Oppenheimer a trece un monton di hende na cinema cu un drama complica tocante J.Robert Oppenheimer y e creacion di e bom atomico.
“Pa bon of malo, nos ta bibando den e mundo di Oppenheimer,” Murphy a bisa den su discurso. “Mi kier dedica esaki pa e peacemakers di mundo.”
Como un pelicula yen di inkietud pa capacidad humano pa destruccion masivo, Oppenheimer tambe a sobresali—hasta riba su partner den fenomeno cultural “Barbie”—como un pelicula cu ta pas pa e temponan di cataclismo, traha pa humano of no.
E Oscars diadomingo na e Dolby Theatre na Los Angeles a tuma luga entre un clima di guera na Gaza y Ucrania, y cu un eleccion na Merca posiblemente transcendental na horizonte. Premionan pa e ganado di documentario 20 Days in Mariupol, y “best international film” The Zone of Interest, a trece geopolitica riba e escenario di Oscars.
E prome premio di e anochi tabata un di e mas predecible: Da’Vine Joy Randolph pa “best supporting actress” pa su prestacion den The Holdovers. Un Randolph emocional a ser acompaña riba e escenario pa su colega Paul Giamatti.
E premio pa e categoria mas enfoca a bay pa Emma Stone, ken a gana “best actress” pa su prestacion como Bella Baxter den Poor Things. Den loke a ser mira como e categoria mas anticipa di e Oscars, Stone a gana Lily Gladstone di Killers of the Flower Moon. Gladstone lo por a bira e prome Mericano Indigena pa gana e Academy Award.
E victoria pa Oppenheimer a ofrece Hollywood un chens pa celebra a pesar di e tormenta den e industria di pelicula. E pelicula di Nolan a debut aña pasa mientras cu actornan a uni cu escritornan den un welga tocante economiconan di plataforma di streaming y inteligencia artificial. E welga di e actornan a caba na november, pero e inkietud no a baha den Hollywood.
Pero “Barbenheimer” tabata e tipo di fenomeno no plania cu Hollywood mester. E dos pelicula por tin un efecto positivo riba e locucion di e Oscars, cual historicamente e beneficia di tin pelicula den contencion. E audiencia mas grandi di e Academy Awards tabata ora e pelicula Titanic a gana mayoria premio durante e Oscars na 1998.
