Desaroyo di plannan pa gas natural pa WEB y e plan di Utilities pa busca informacion riba un parke di molina di biento tin partidonan di oposicion – y awor tambe sindicatonan – representantenan comercial y otro grupo organisa hopi preocupa. Esaki particularmente despues cu expertonan di WEB, miembronan di e Asociacion di Trahado cu Contrato Individual den servicio di WEB, esta WVI a presenta nan preocupacionnan dilanti siman pasa.
Fraccionnan AVP, MAS y Accion21 a manda carta tanto pa Prome Minister, Evelyn Wever-Croes como Presidente di Parlamento, Edgard Vrolijk unda ta pidi ponencia di Gobierno riba e preocupacion di WVI cu Utilities ta asumi responsabilidad cu ta toca WEB ora cu a emiti e ‘expression of interest’ pa e parke di molina di biento na Rincon. Tin yen di asunto cu ta impedi comunidad di tin confianza den maneho di utilidad, particularmente e productonan esencial cu ta awa y coriente.
E fraccionnan a ilustra e dos ‘golden handshakes’ cu a duna na ex-Directornan di WEB sin cu por a duna splicacion di detayenan pakico, mientras cu personanan yega na e Ministernan actual a keda nombra den funcionnan clave. Despues a sigui e acuerdo cu Eagle LNG cu a sucede sin ningun transparencia (fraccionnan cu ta sostene gobierno a bay di acuerdo pa tene e contract secreto). Pero ta e urgencia di WVI pa ilustra cu no a envolvi nan den e negociacionnan cu Eagle LNG, y cu a scoge pa pone e terminal na RDA – a pesar di e hecho cu investigacionnan haci door di WEB ta mustra cu e opcion menos costoso ta si pone e terminal na Barcadera – a pone e fraccionnan haci otro intento pa haya splicacion di Gobierno. Particularmente pasobra a mustra cu e terminal na Barcadera ta nifica cu e tuberia di gas lo ta unicamente 2 kilometer y no mester pasa den barionan cu ta hopi habita, manera na Savaneta y Pos Chikito.
E fraccionnan tambe kier sa di con Gobierno pa medio di Utilities NV a y ta obstrui WEB pa hedge combustible pa motibonan politico.
Segun AVP, MAS y Accion21, e violacionnan contra Good Corporate Governance cu Gobierno a demostra ta escandoloso y sin precedencia. Como tal ta urgi Prome Minister Evelyn Wever-Croes pa instrui Utilities Aruba NV pa para mesora cu tur infraccion riba competencianan exclusivo di WEB NV. Na Presidente di Parlamento a bay un carta unda ta pidi cu caracter di urgencia, un encuentro publico riba e tema y preocupacion di tanto sindicato di trahadonan di WEB, SIWA y tambe WVI. E fraccionnan di oposicion kier presencia di representantenan di e dos organisacionnan aki den e reunion.
Mientrastanto tur organisacion cu ta cay bao Mediador di Pais Aruba (sindicatonan), organisacionnan di dunador di trabao y asociacionnan di interes a manda un carta cu caracter di urgencia pa Presidente di Hunta di Comisario di Utilites Aruba NV, Sr. Robert Maduro, pa un reunion riba e mesun tema, esta desaroyonan preocupante na WEB.
E organisacionnan cu ta inclui SADA, TOPA, SIMAR, CUA, OPPA, SPA y Sr. Anselmo Pontilius como Mediador a reuni cu WVI dia 26 di September ultimo y nan ta hopi preocupa cu e desaroyo y kier un combersacion mas pronto posibel cu Utilities Aruba NV pa haya aclaracion.
