Oposicion Venezolano residencia na Aruba ta haci un yamada pa nan compatriotanan no bay vota den eleccion presidencial cu lo tuma luga den consulado General di Republica Bolivariano di Venezuela, mañan diadomingo.

Laura Luces kende ta un di e lidernan di oposicion Venezolano na Aruba a declara na Bon Dia Aruba cu e gobiernonan di varios pais di mundo ta considera como ilegal e eleccion aki. Na ultimo nan a haya sa riba e convocatorio cu e consulado a haci pa bay vota. Aunke nan tabatin e sospechoso cu esaki lo tuma luga, pasobra semper nan a realisa e eleccion aki.

Comunidad internacional y Hulanda
El a bisa cu no solamente oposicion Venezolano na Aruba ta haya e eleccion aki ta ilegitimo. Tambe e grupo di Lima cu ta wordo integra pa varios pais entre nan Mexico, Colombia, Merca, Canada y Peru. Tampoco Brasil ni Argentina ta acepta e eleccion aki, pues mayoria di paisnan di Latino America. Union Europeo y parlamento Europeo a laga sa cu nan no ta acepta e resultado di eleccion di diadomingo awor. Tambe Organisacion di Estado Americano (OEA) a bisa cu nan no lo acepta esaki.

“Tur comunidad internacional ta bisa bo di un manera cla y directo cu nan no ta acepta e eleccion aki pasobra nan ta ilegitimo y ilegal. Tambe e instancia cu ta convoca e eleccion aki ta invalido, pues mi ta kere cu tur cos a wordo bisa caba…” Ademas un 60% di e poblacion Venezolano a bisa cu nan no ta bay vota”, e di.

Sinembargo di otro banda e ta haya cu e gobierno di Hulanda no a mustra un posicion fuerte contra e eleccion aki, manera otro paisnan si a yega di haci. El a menciona cu e gobierno di Canada a prohibi pa e consulado di Venezuela realisa e eleccion aki den nan teritorio.

For di su punto di bista e ta haya cu Hulanda no tin posicion cotundente. “Nos a spera mucho mas di Hulanda.” Semper nan a considera Hulanda como un pais di prome mundo. Un pais digno, democratico, respetuoso di e derechonan humano. “No tur cos mester ta placa. Tin cosnan mas importante manera dignidad y orguyo di Hulanda su pueblo.”

Na Colombia presidente, Juan Manuel Santos a denuncia cu nan a descubri 400 ton di alimento di mal estado pa e consumo humano cla pa wordo exporta pa Venezuela den cuadro di eleccion di mañan. “Esaki ta pa cumpra consenshi.” E ta denuncia un sorto di chantahe, ya cu e persona ta haya un saco chikito di cuminda, pero e mester bay vota pa e candidato cu tur hende sa. E ta cualifica esaki como un chantahe horibel, unda e gobierno di Nicolas Maduro ta hunga cu e hamber y dignidad di e pueblo Venezolano, sin conta e cantidad di hendenan cu ta muriendo pa falta di medicina.

Accion di firma
Oposicion Venezolano no solamente ta haci un yamada pa no bay vota, pero tambe nan ta realisando un accion di firma cu lo tuma luga den nan sitio di reunion custumbra na Plaza Simon Bolivar for di 10’or di mainta te cu 4’or atardi.

Nan ta abstene di manda nan testigonan pa supervisa e proceso y resultado di eleccion den consulado di Venezuela. Semper miembronan di oposicion tabata presente den tur eleccion cu a wordo celebra na Aruba, y cu nan a wordo convoca di manera legitimo. Pero e biaha aki si nan ta considera e convocatorio di eleccion di mañan totalmente ilegitimo.

Nan como oposicion no ta reconoce Asamblea Nacional Constituyente como un organo legitimo. Ademas sra. Luces a laga sa cu e compania Smartmatic encarga di e contamento di voto electronico a denuncia cu e resultado di eleccion ultimo cu a duna Nicolas Maduro como ganado, tabata fraude. Despues di esey e compania Smartmatic mester a cera su porta na Venezuela, despues cu nan a atende 14 eleccion durante 3 lustro.

E ta haya como Venezolano cu no tin palabranan pa expresa loke nan ta sinti ora cu nan ta wak e cantidad di violacion aki. No solamente contra constitucion mes, pero te hasta contra e nivel mas minimo di decencia di un pais, nan no ta wordo respeta. Nan ta haci bofon di tur cos. “Nan ta burla di nos constitucion, nos Venezolanonan y tambe di otro paisnan. Nan ta burla di tur cos.”

Nan ta prefera pa tur hende Venezolano y no Venezolano bay sostene un peticion cu nan firmanan. Den e documento aki nan ta pidi pa e paisnan cu ta forma parti di Statuto di Roma, tambe e paisnan liber y amigonan di Venezuela, pero generalmente e comunidad internacional, pa nan no reconoce e eleccion falso aki.

Tambe pa medio di e documento aki nan ta pidi pa garantisa e compromiso di husticia internacional pa atende e situacion di Venezuela. Pa asina cuminsa un investigacion contra e violacion sistematico y general contra e derechonan humano na Venezuela den cuadro di articulo 14.1 di Statuto di Roma.

Mas motibonan pa no bay vota
Sra. Luces a bisa cu nan lema ta: “No bay vota pasobra nos no por eligi.” Tur hende ta vota pa eligi, pero den e caso aki nan no ta eligi na Venezuela. Pasobra e candidatonan di oposicion na Venezuela ta den prizon. Tambe algun di nan ta impedi pa bay eleccion of nan ta den exilio.

E di dos motibo cu oposicion ta pidi pa no bay vota ta pasobra no tin garantia ni transparencia den e eleccion aki. No tin un CNE (Conseho Nacional Electoral) imparcial. E di tres motibo ta cu e candidato presidencial Nicolas Maduro no ta cumpli a lo menos cu un di e rekisitonan minimo cu e constitucion ta pidi, esta cu e candidato mester ta Venezolano di nacemento. Pero un argumento cu nan ta considera di peso ta cu Asamblea Nacional Constituyente ta un instancia totalmente ilegitimo, y nan ta esun cu a haci e convocatorio di e eleccion aki, locual ta ilegitimo tambe.