(InfoBae).- Despues di dos luna cu oposicion a dicidi di suspende protesta y cuminsa cu e dialogo cu representante di Chavismo y gobierno, e grupo di partido cu ta pertenece na Mesa di Unidad Democratico ta pensa riba e posibilidad di cuminsa di nobo cu protesta masivo, pa motibo di e resultadonan di e eleccion regional cu a tuma lugar diadomingo ultimo.

Oposicion Venezolano a solicita na nan candidato pa sali cu diferente actividadnan di caya pa asina apoya e decision di no acepta e resultadonan oficial di eleccion regional, despues di dos luna cu oposicion a acorda pa stop nan protesta, cu tabata tumando lugar durante 4 luna y cu a laga 150 morto mey mey di un represion fuerte di banda di gobierno.

“Awe nos ta na un momento hopi grave pa e republica y pa nos pais, nos ta enfrentando un sistema cu no ta duna nada di confiansa, caminda poco hende ta kere cu e sistema electoral di Venezuela ta cla y sigur pa esnan cu ta participa den votacion na e pais aki,” Gerardo Blyde, hefe di campaña di MUD a splica.

Blyde a yama tur politico cu ta den y pafo di Mesa di Unidad Democratico pa uni nan tur den mesun linea politico y cu un criterio y strategia comun,” pa asina combati e regimen di Nicolas Maduro.

“Nos ta invita e pueblo Venezolano pa lucha y cambia e sistema electoral cu no ta confiabel,” el a bisa.

Banda di gobierno tabatin 20 gobernacion estatal caba y aunke nan a perde tres, nan ta considera e resultado como un triunfo den e proceso electoral cu a tuma lugar diadomingo ultimo, pasobra tur encuesta tabata menciona Mesa di Unidad como faborito pa gana e eleccion na 18 estado, den caso di un participacion halto den eleccion, loke no a sucede, cu un participacion di 61%.

Encuesta manera di Delphos y Datanálisis tabata bisa cu si e cantidad di hende cu lo a dicidi pa no participa tabata abao, oposicion lo por tabatin posibilidad di gana entre 11 y 18 gobernacion. Algo cu no a sucede.

“E resultadonan ta totalmente diferente, compara cu e pronostico cu tur encuesta tabata mustra, unda e banda di Chavismo tabata como minoria,” Edgard Gutiérrez director di Venebarómetro a splica.

Cu e situacion aki, e via pa un posibel negociacion entre gobierno y oposicion a kibra drasticamente, Luis Vicente Leon a opina.

“Dialogo ami no ta kere. Nos ta den un situacion complica, y e futuro cu nos ta mira ta mas confrontacion,” Luis Salamanca, politologo a bisa.