Oposicion Venezolano a anuncia un proceso di consulta riba asamblea constituyente

Dialuna oposicion Venezolano a anuncia un consulta o plesbicito riba dia 16 di juli, pa cu henter pueblo di Venezuela por bay y dicidi si nan ta di acuerdo of no cu convocatorio di presidente Nicolas Maduro pa establece un Asamblea Nacional Constituyente.

“Pueblo lo por dicidi si ta rechasa of desconoce constituyente cu a ser convoca ilegalmente  y contra constitucion di Venezuela, di banda di Nicolas Maduro,” Julio Borges, presidente di Parlamento, cu tin un mayoria  di parlamentario di oposicion, a splica. Borges  a bisa cu den consulta nan lo puntra na tur Venezolano cua ta e funcion cu Venezolano ta solicita for di funcionario publico y forsa arma, pa asina restitui orden constitucional”. Otro pregunta di e consulta tin e obhetivo cu pueblo por dicidi si ta convoca of apoya un renobacion di podernan publico cu ta traha fuera di mandato constitucional,” Borges a declara. “Nos ta convoca pa 16 di juli, pa nos por eligi  futuro di pais Venezuela den  un proceso di decision soberano, y asina por cuminsa pa defende e  decision cu por sali for di e proceso ey, cu activacion di un etapa di lucha superior,” e hefe parlamentario a splica.

Borges a bisa cu lo solicita e iniciativa na Parlamento, y asina e organo aki lo por yama oficialmente un consulta popular. E parlamentario no a informa e via operativo cu nan lo usa pa e consulta di plesbicito, sin participacion di poder electoral. Poder electoral ta acusa pa e grupo di oposicion di ta traha pa gobierno di Maduro. “E proceso di tuma votonan lo ta manual, pero despues nan lo  establece e posibel procedura. Nos ta drenta den ora cero,” Henrique Capriles, lider di oposicion a bisa. Capriles a splica cu e grupo di oposicion ta dunando tur di nan, pa logra algo prome cu dia 30 di juli, ora cu poder electoral a yama pa un eleccion di hende cu lo integra e asamblea constituyente.

Capriles a sigura cu e consulta popular lo tuma lugar mientras cu e protestanan cu oposicion ta haci desde dia 1 di april, y cu te e siman aki a laga 89 morto, ta continua. “Actividad di consulta ta algo manera un complemento di nos lucha,” el a splica. Maria Corina Machado a declara cu oposicion lo instala 1600 lugar, destina pa  Venezolanonan  cu kier manifesta nan opinion y nan voto den consulta popular na Venezuela y 108 punto pafo di Venezuela, kier men den exterior pa esunnan cu ta bibando na otro paisnan.