ORANJESTAD – Diamars ultimo, prome minister Hulandes, Mark Rutte, a realisa un bishita relampago na Aruba; y prome cu e mandatario a yega nos isla, lider di fraccion di oposicion, Marlon Sneek (AVP) a referi na e bishita aki.
Den cuadro di e bishita aki, e lider di e diferente fraccion y presidente di parlamento a haya un mey ora pa intercambia cu e premier Hulandes y e delegacion cu a bin cune. Sinembargo, Sneek a lamenta cu e gobierno no tin un vision cla pa probecha di e tipo di bishita aki. Ya cu e mandatario a bin di Corsou, despues cu a firma diferente protocol den cuadro di un actividad comercial. Mientras cu na Aruba, premier Rutte a bini unicamente pa ‘dal su lunch y pa e sigui’.
E ta haya cu gobierno di gabinete Wever-Croes kier aparenta un bon relacion cu Hulanda; pero e realidad ta cu Hulanda no tin un relacion ‘real’ cu nos pais. Te hasta el a tende cu minister Knops di asunto di Reino ta keda atras pa garantisa cu e ley di LAft (Landsverordening Aruba financieel toezicht) ta bay pasa, pasobra Hulanda no ta bay warda mas. Ya cu gobierno di Aruba no ta cumpliendo cu e protocol cu nan mes a firma na december ultimo.
El a referi cu mientras gobierno anterior (Mike Eman I y II) a traha pa crea un pilar economico nobo, te hasta a yega di organisa e actividad di Europe Meet America, pa meramente nos isla por haya companianan estableci na Europa y specificamente na Hulanda, pa bin establece na Aruba tambe. E vision tabata pa uza Aruba como un ‘hub’ pa conecta Europa cu Sur America. Sinembargo, un di e prome decision di e gobierno aki tabata di para e actividad di Europe Meet America.
Awor, e parlamentario aki ta haya cu Aruba ta perde di gana y ta mira para na banda na Corsou, cu a bin cu un evento comercial grandi, caminda premier Hulandes a bin cu un delegacion comercial Hulandes, unda a trata di cera e base pa un colaboracion comercial mas fuerte. Kiermen treciendo e sectornan economico di e isla y di Hulanda mas cerca otro.
For di diadomingo, e evento aki cu ta tumando luga na Corsou, cu a bira un escenario unda e comerciantenan presente ta sondea e posibilidad pa cera contracto pa bin cu companianan na Corsou.
E ta haya cu pais Aruba a yega di traha duro riba dje pa bin cu compania for di Sur America y Europa pa por garantisa lasonan comercial nobo, y creando un pilar economico nobo pa nos pais, probechando e experticio di nos yiu di tera . “Un apertura cu gabinete Eman II a traha riba dje”, el a bisa. E ta agrega cu nos hendenan ta conoce e dos culturanan tanto di Sur America como esun di Europa, y sigur nos tabata e yabi pa garantisa e actividad economico aki.
E ta un di e motibonan cu a dicidi, entre otro, pa purba bin cu un ‘pre-clearance’ pa Europa via di Hulanda. Tambe a muda waf pa bin cu espacio na Barcadera pa por duna e servicio y garantisa actividad economico riba nos isla. P’esey e ta tilda e gobierno aki como uno falta di vision. Mientras nos por mira ‘Corsou cu ta pasa nos dilanti y bay cu e frutanan’.
Sneek ta decepciona cu awor Corsou a bay cu e frutanan aki debi cu –segun e- e gobierno aki no tin un bon relacion cu gremio y Hulanda. Pero tambe nan no tin vision, y e ta lamenta cu algo cu pais Aruba a traha duro y a start prome cune, a bay perdi. Ya cu awe comerciantenan Hulandes ta na Corsou firmando convenionan y MoU (memorandum of understanding) pa garantisa actividad economico entre Europa y Sur America.
