Haci burla di hecho comproba no…

Desde inicio di e gabinete actual nos a anticipa un oposicion fuerte di e anterior gobierno, awe sinta den banki di oposicion. Esey riba su mes ta bon, asina mester ta, pa tene e actual mandatarionan responsabel pa e maneho hiba den e periodo do gobernacion actual. Pero un cos si: no mester haci burla di hecho comproba y de paso trata na despista hende menos bon informa. Pero pa esey tin prensa, pa yuda corda publico riba tur esaki. Algun ehemplo.

E anterior ministro encarga cu Energia, cu tabatin e maneho di suministro di awa y coriente como su responsabilidad, awor ta critica gobierno pa a bay di acuerdo pa hedge e compra di fuel oil pa WEB Aruba NV. Segun e ex mandatario, den campaña a priminti cu lo bay investiga e supuesto iregularidadnan cu lo a tuma luga cu hedging den pasado reciente y cu lo no bay hedge mas den futuro. Pa loke ta e prome asunto, hedge na un manera responsabel no ta kita e necesidad, y nos ta spera cu gobierno lo cumpli cu esaki, di un investigacion, eventualmente den forma di un investigacion entama pa parlamento, di loke a sucede den e hedging di 100% di e suministro di fuel oil, na un momento cu tur experto y laico informa tabata na altura cu e prijs halto di crudo y fuel oil momentaneo lo a bay baha substancialmente. Hedge e compra di fuel oil pa varios aña den e coyuntura ey no ta nada menos cu un locura completo. Y ken tabata responsabel pa e hazaña aki? E apreciabel miembro di parlamento cu awe ta lansa critica riba gobierno actual pasobra, mescos cu prome cu 2009, ta hedge parti di e costo di fuel oil solamente pa tempo limita, luna, no aña pareu.

Y e apreciabel parlamentario no por laba man, pasobra ta e mes como ministro a expresa publicamente e cambio di maneho di fuel oil pa hedge 100% di compra, pa tempo mas largo. Cu despues el a laga un compania di accountancy haci un investigacion cu no a inclui e nivel ministerial ni e top di Utilities, obviamente tabata pa proteha su mes y esunnan di su confiansa, no ta kita nada di e preguntanan grandi cu a keda den comunidad encuanto e caso aki, cu a costa e consumidor un par di cien miyon florin por lo menos. Ademas, den un caso cu daño financiero asina grandi, lo no ta logico pa investiga tambe si por tabatin pago ilicito na persona envolvi den e areglo di e acuerdo aki, pa facilita esaki? No ta esey nos ta mira pasa den tur pais rond di nos continuamente? Nos ta miho cu nan? Hopi di nos, sigur despues di 28 di maart 2018 no ta kere esey…

E otro caso ta esun di e ex ministro di husticia, cu ta critica e actual ministro presidente pa a menciona un cifra di cantidad di Venezolano indocumenta cu lo tin na e momento aki na Aruba. El a menciona e cifra di 12.000 riba pregunta di prensa Hulandes. Esey ta un cifra exacto? Segun e ex ministro no, pero den e caso ey, ken tabatin acceso te un par di luna pasa na e cifranan exacto? Pakico e no a papia cla anto? Na mes momento cu e ta critica e prome ministro, pa ocho aña largo e tabatin acceso na e cifranan disponibel cerca e instancianan bao di su encargo, anto e por a duna awor e situacion di dos luna pasa, of no? Y e no por bisa cu no por, pasobra si djis tuma e cantidad di hende, registra cu nomber y fam y lo demas, cu ta keda atras tur dia di aña y cu ta drenta via aeropuerto o waf, y ya bo tin informacion di mayoria di ilegal na Aruba. Den e tarea aki tur hende sa cu ta un minoria so ta bin via nos costanan. Nos a yega di tende e anterior ministro aki duna informacion na comunidad tocante e asunto aki? No cu nos ta corda.

Ta keda un cuestion discutibel si e ministro presidente mester a menciona un cifra si of no. Por ta cu el a considera miho duna algo di informacion, na luga di mustra ignorante bisando cu e no sa. Y, papiando di e probabel cifranan real, e ministro tabata way off mark? Probablemente no.

E discusion tocante cifra sin embargo ta kita atencion di e asunto mas urgente, y esey ta cu nos mester atende e creciente probabilidad cu dentro di poco e indocumentadonan ta hopi mas cu 12.000 y nos lo no ta papiando mas di ‘ilegal’ pero di refugiado. Esaki a base di e desaroyonan reciente na e pais bisiña. Importante ta pa constata cu na e momento ey ya no ta un responsabilidad exclusivo di Aruba como teritorio insular dentro di Reino Hulandes, sino cu e ta un responsabilidad comparti. Ta logico anto cu lo mester tin un maneho general di Reino pa mira con nos ta bay atende e asunto aki. No ta keda hopi tempo mas pa prepara y ta spera di gobierno pa actua diligentemente den esaki.