Siman pasa Bon Dia Aruba tabatin e primicia cu su publicacion unda a pone luz riba e “muchanan indocumenta”. Den e articulo a constata cu tin mas o menos 400 pa 1000 mucha ta bayendo scol indocumenta. Hopi biaha nan ta confronta cu problemanan di ilegalidad ora bira mayor di edad y kier cuminsa un estudio avansa. Ayera atardi gobierno a anuncia cu lo bin cu un proyecto nobo dirigi na e grupo aki.
Durante un conferencia di prensa prome minister Mike Eman hunto cu minister Benny Sevinger di Maneho di Stranheria y director di Dimas,. Kathy Paskel a anuncia cu for di 1 mei ta drenta na vigor e proyecto ‘Dreamers’. Cu lo duna studiantenan y muchanan indocumenta e oportunidad pa haya firma liber.
Segun e mandatario Sevinger nan sa di e problemanan di muchanan cu ta keda sin permiso pa hopi aña. Unda pa un motibo of otro, mayornan di menor di edad no a trata of logra haya permiso. Y asina e muchanan aki ta cay den un ciclo, unda nan ta bay scol sin seguro of permiso y na e momento cu nan caba scol ta compronde cu no por sigui cu estudio afo of enseñansa avansa. Hopi di e muchanan aki a nace na Aruba y ta sinti nan mes Arubiano pero ta haya nan mes confronta cu nan ta ilegal na e pais.
A purba di yuda e personanan aki durante e ultimo añanan. Aña pasa a reactiva e cadena pa stranhero, esta ‘vreemdelingenketen’. Unda tur e instancianan di gobierno lo traha hunto riba e maneho aki. “Dimas a bin cu un solucion cu gobierno a aprecia y asina a bin cu e proyecto Dreamers. Bou di e proyecto aki, personanan cu ta cuadra cu e criterionan lo haya e firma liber. Bou di e firma liber ta cay; firma liber pa enseñansa of permiso di labor”, minister Sevinger ta splica. Directora di Dimas Paskel ta bisa cu e departamento tin algun luna ta pensa riba un solucion pa tema aki. Pa asina wak con pa conseha gobierno pa atende cu e grupo specifico aki na un miho manera. Tabata tin consultanan cu instancianan afo manera IND di Hulanda y tambe NTO Corsou, pa wak con a nan ta deal cu e tipo di problemanan aki den Reino. Banda di esey tin diferente pactonan cu a cera cu instancianan pa asina tin un team multi diciplinario cu ta trata cu casonan individual.
Proyecto Dreamers
E proyecto aki ta habri caminda pa esnan cu tin un minimo di 10 aña continuo bibando na Aruba, di cual 5 aña ta studiante na un instituto educativo local y cu tin un carta di Buena Conducta, pa inicia e tramitenan pa yega na un permiso tipo firma liber. Di e manera aki e personanan aki por formalisa nan residencia riba nos isla, sea door di traha of continua cu nan estudio den exterior, entre otro. E proyecto ta basa riba e ‘DREAM Act’ (Development, Relief and Education for Alien Minors) cu Merca a firma bek na 2001 cu Gabinete Mike Eman a mira tambe ta necesario na Aruba, ya cu na varios ocasion ta topa cu e tipo di casonan aki den nos comunidad.
No tin mesun derechonan
Bon Dia Aruba a puntra sra. Paskel si e firma liber cu lo wordo duna bou di e proyecto Dreamers ta duna e mes un derechonan cu un ciudadano cu paspoort Hulandes. E ta contesta cu esaki no lo ta al caso. “E permiso liber y un paspoort Hulandes ta dos cos separa. Dimas ta atende primeramente cu parti di permiso”. Esey ta nifica cu un persona cu ta rekeri di permiso pa biba na Aruba, ta legalmente estableci. A base di esey e persona aki ta un residente y e por beneficia cu tur e derechonan cu ta bin conhuntamente cu esey como residente.“E paspoort ta parti di Reino unda un persona kier aplica pa nacionalidad Hulandes mester cumpli cu e criterionan.”
Anochi di informacion
Dimas ta preparando dos anochi di informacion cu ta tuma luga riba 5 y 12 di mei proximo y hunto cu ne, tur diabierna pa un termino di dos luna, e Departamento di Integracion, Maneho y Admision di Stranhero lo tin un loket special disponibel pa duna informacion, ricibi formulario di peticion y atende cu tipo di casonan aki.
Publicacion y su efecto
E publicacionnan di Bon Dia Aruba siman pasa a haya hopi comentario. Nos kier informa tambe cu un di e hoben studiante cu tabata pega den e situacion di ‘ilegalidad’ y cu Bon Dia Aruba a entrevista, a haya un reaccion positivo for di Dimas pa su permiso.
Manera nos a indica hopi biaha e muchanan/hobennan kier bay dilanti pero pa motibo cu nan mayornan a keda pega cu e procedura of no a informa nan, momento di yega edad di 18 aña ta cay den e situacion indesea cu nan no tin papel mas pa por keda legal riba nos isla. Mientrastanto for di chikito nan ta biba na Aruba y ta sinti nan mes Rubiano tambe. Asina nos a pone luz riba e grupo aki y ayera por mira cu gobierno awor lo bay ta mas activo pa busca un solucion pa e grupo aki cual hopi ta den un situacion insigur pa hopi aña.
