The STEM Embassy (TSE) ta un organisacion lanta na aña 2021 y ta consisti di 12 studiante di Aruba y Corsou cu ta studia Hulanda, Merca y Suisa. Tur tin e mesun mision: lanta curiosidad y confiansa den STEM den un ambiente cu ta accesibel na un y tur ariba e islanan ABC. STEM ta para pa estudionan den e areanan di Science, Technology, Engineering y Mathematics (Ciencia, Tecnologia, Ingenieria y Matematica).

Miembro nan di The STEM Embassy a ripara cu hopi mucha no ta sigui un estudio den STEM, kisas door di miedo pa purba of door di falta di informacion. Awendia e peticion pa ingeniero den sector laboral ta birando mas grandi y e cantidad di studiante cu ta scoge pa bay studia den e ramo di STEM no ta creciendo. TSE a dicidi cu ta momento pa tuma iniciativa y mustra e siguiente generacion di studiantenan cu tin futuro y oportunidad di haya un trabou den STEM riba e islanan ABC. E mision di TSE a bira realidad aña pasa unda nan a organisa nan prome STEM summer camp: “Ki’ Ta Bo STEM? Aruba 2022” unda muchanan a participa den diferente tayer incluyendo robotica, coding, biologia y mucho mas. Esaki tabata un gran exito.

E aña ‘ki TSE ta invita e pueblo di Aruba na e di dos STEM summer camp: “Ki’ Ta Bo STEM? Aruba 2023” pa muchanan entre 12-21 aña di edad y lo tuma lugar dia 26-29 di juli na Universidad di Aruba. Tin un total di 150 lugar disponibel y lo tin 6 diferente tayer incluyendo ingenieria, biologia marino, kimica, y hopi mas. Cu e tayernan, TSE kier pa e muchanan haya un chens pa explora nan interes den STEM y inspira e muchanan pa sigui descubri nan pasion. E evento ta caba dia 29 di juli cu un STEM Festival cu ta habri pa publico. Diferente organisacion y compania den e area di STEM lo ta presente pa brinda informacion na comunidad henter.

TSE kier indica cu no ta importa e nivel di estudio di e muchanan y pa por participa conocemento di STEM di antemano no ta necesario. E meta di TSE ta pa crea interes den e areanan di estudio di STEM den un ambiente mas inclusivo posibel.

Por sigui tur informacion tocante registracion pa e evento via Facebook, Instagram @TheSTEMEmbassy y nan website www.thestemembassy.com.