Ayera mainta durante un conferencia di prensa, director di ImSan, dokter Joel Rajnherc a anuncia cu e vacatura pa ‘Huisartsenopleiding Aruba’ ta buscando candidatonan nobo.
Dokter Rajnherc a anuncia cu e vacatura pa e prestigioso “Huisartsenopleiding Aruba” cu ta acredita pa Amsterdam UMC lo ta buscando candidatonan entusiasma cu a completa nan estudio na Hulanda of cierto universidadnan den region, cu tin un titulo di “Master Degree” y cu ta cualifica pa tin un registracion di BIG of AruBIG.
E persona aki lo tin e oportunidad aplica pa cuminsa e opleiding for di 1 di Augustus 2024 como AIOS (Arts in Opleiding tot Specialist) pa asina specialisa nan mes durante 3 aña pa bira dokter di cas aki na Aruba.
E Huisartsenopleiding Aruba a cuminsa na 2009 cu e meta di reforsa e “eerstelijnszorg’ aki na Aruba. E opleiding ta keda organisa door di Huisartsenopleiding Amsterdam UMC conhunto cu Departamento di Salubridad Publico di Aruba (DVG) y Huisartsen Vereniging Aruba (HAVA) y ta wordo acomoda na nos hospital “Instituto Medico San Nicolas” (ImSan).
Minister di Salud Publico, Sr. Dangui Oduber kier invita candidatonan cu ta bin na remarca pa aplica mas lihe posibel pa e opleiding pa por specialisa y bira dokter di cas na Aruba.
