“Camara di Comercio su vocero ta su presidente”, asina presidente di e institucion aki, sra. Daphne Agius Cesareo-Lejuez a bisa.
Di e forma aki e ta descualifica cualkier comentario duna pa un miembro di KvK recientemente den nomber di nan directiva. P’esey Sra. Cesareo-Lejuez a bisa cu vocero di KvK ta su presidente y cualkier otro opinion duna pa cualkier miembro di e directiva ta su “opinion personal”.
Presentacion acuerdo Citgo
Den nomber di KvK, sra. Daphne Agius Cesareo-Lejuez a bisa cu nan a asisti na e presentacion di gobierno riba e acuerdo cu a keda firma cu Citgo. Aunke su mesun persona no tabata presente, pero miembronan di directiva di KvK si tabata eynan.
“Mi ta compronde cu e presentacion aki tabata uno hopi positivo y cu ta mustra cu lo ta beneficioso pa Aruba”, el a laga sa. Aunke e ta bisa cu ainda como KvK nan no a duna nan reaccion, pasobra ainda ta falta e documentacion pa wak si den berdad esaki ta beneficioso pa Aruba.
E ta bisa cu e miembronan di directiva di KvK ta forma parti gewoon di e directiva, pero e presidente ta esun cu ta e vocero oficial di e instancia aki. E vocero ta esun cu ta trece e opinion di KvK dilanti.
E no ta kita cu e miembronan di e hunta di KvK lo por tin nan opinion personal “pero nunca ta papia den nomber di Camara di Comercio”. Cesareo-Lejuez a lamenta e echo cu un miembro di e hunta a papia expresando un opinion personal cu a wordo treci dilanti como si fuera di KvK, mientras cu esun autorisa ta e como presidente.
E ta agrega cu como KvK nan ta hopi cla ora cu nan ta trece un comunicado pafo. Tambe nan ta organisa nan conferencia di prensa y nan ta manda nan comunicado bou e logo di KvK. Y como presidente e ta esun cu ta papia pa emiti un opinion cu tin di haber cu e instancia aki. Si e no ta presente esun cu tin autoridad ta e vice-presidente of su reemplasante .
