Ocho cadaver tabata den interior di un truck y tres curpa riba e porta. E curpanan di 11 persona a ser haya, diamars cerca di mei anochi na municipio di Boca del Río, na Veracruz, despues cu gobierno Mexicano a anuncia un operativo contra crimen organisa na e zona ey, autoridad a informa.
Reporte di polis a informa cu nan a mira cu tur curpa tabata presenta seña di tortura, y un mensahe caminda nan tabata adverti cu: “ si nan kier guera, anto guera lo bay tin”. Di 11 curpa, 9 di nan tabata homber y dos di nan muhe. Nan a ser haya despues cu autoridad federal y estatal a anuncia e comienso di un operativo special contra delincuencia organisa, na 9 municipio di region central, pa asina logra cierto obhetivo bon determina caba.
E curpanan a ser bandona riba caya di Paseo Puerto Bandera, na bario Graciano Sánchez, na municipio Boca del Río. E auto tabata riba skina di un scol secundario federal di Mexico, y ta pesey bisiña di e lugar a detecta e situacion rapidamente y a avisa autoridadnan. Secretario di gobernacion di Mexico, Miguel Angel Osorio Chong a informa cu miembro di gendarmeria nacional y ehercito Mexicano a haci un operativo special riba nuebe municipio, caminda tin mey miyon di habitante ta biba. Funcionario di polis federal a anuncia un operativo na municipio di Ciudad Mendoza, Nogales, Río Blanco, Fortín, Córdoba, Amatlán, Cuitlahuac, Yanga y Omelaca.
“Nos tin tur obhetivo hopi cla, nos sa ken ta nan, y nos lo bay pa nan, pa tur cos cu nan ta representa hunto cu otro integrantenan di mesun banda”, Osorio Chong a bisa.
