Diaranson mainta, Biologo Marino sr. Byron Boekhoudt di departamento di Santa Rosa y afilia na fundacion Centro di Pesca Hadicurari a bisa cu nan ta trahando cu tur instancia pa combati e especie invasivo di Lionsfish.
“E ta un tarea di nos tur cu ta stima nos lamanan, pasobra e Lionfish ta un menasa pa tanto nos industria turistico, pero tambe pa nos industria di piscamento”, el a declara.
Sr. Boekhoudt kier habri wowonan di tur hende, specialmente esun dedica na e actividad sambuyamento y piscamento, ya cu si nos no ta cuida contra e Lionfish aki, poco tempo e piscanan cu tanto nos ta gusta pisca den nos awanan y gusta come riba nos platonan crioyo, no lo t’ey mas.
Operadonan di buceo
El a haci un apelacion special na e operadonan di buceo pa coopera den esaki. Pa nan pone un dia disponibel kiermen un boto cu un team di sambuyado boluntario cu ta tira Lionfish. El a laga sa cu honestamente nan ta sinti aña aden aña afo e piscadonan y hobennan ta participa y muchanan di scol ta mustra interes, pero operadonan di buceo ta keda un tiki atras.
E ta haya cu di e forma aki e compania of operador di buceo lo por demostra con importante e rifnan y bida marino ta pa nan industria. “Esey ta nan pan”, el a bisa. El a indica cu di e forma aki nan nomber lo por resalta dia 22 di november den caso cu nan team lo trece cantidad di Lionfish den cuadro di e competencia aki.
Campeonato
Fei 2011 nan ta organisando anualmente e Campeonato Nacional di Lionfish pa stimula e piscamento di e sorto di pisca aki. E torneo aki ta consisti di dos parti: Un ta e parti individual cu bo por participa y cu fei dialuna ultimo e hendenan por cuminsa registra e cantidad di Lionsfish cu nan a coy, y e ta caba te dia 21 di november awor.
E di dos parti ta tuma luga diadomingo 22 di november caminda nan lo tin un evento di un dia so, unda nan ta purba curasha team di buceo pa participa. Riba e dia ey na beach di Hadicurari Centro di Pesca, lo bay tin e evento di premiacion pa 3’or di atardi. E dia ey tur esunnan presente por siña mas di Lionfish, y tambe e publico por purba Lionfish cortesia di e participantenan. Tur presente lo por comproba pa nan mes con sabroso e Lionfish ta, segun sr. Boekhoudt.
Uni forsa contra Lionfish
Sr. Clifford Rosa di Fundacion Rancho, pero e biaha aki bistiendo su pechi como presidente nobo di fundacion Centro di Pesca Hadicurari, a elogia e esfuerso creativo cu tanto nan fundacion hunto cu Aruba Reef Care y Aruba Marine Park ta haciendo pa combati cu e poblacion invasivo di Lionfish den nos rifnan.
“E fundacion un biaha mas ta apoyando cu e iniciativa pa atende cu e problematica di Lionfish”, sr. Rosa a bisa.
El a recorda cu na aña 2011, e fundacion Centro di Pesca Hadicurari a haci un prome esfuerso pa contraresta e presencia di e pisca depredador aki. Igualmente cu cooperacion cu gobierno, kiermen departamento Santa Rosa a cuminsa un proceso pa atende cu e problematica di Lionfish cu ta un menasa pa e poblacion di pisca nativo. El a bisa cu e fundacion Aruba Marine Park tambe tabatin un encargo specifico pa atende cu e Lionfish tambe.
“Na 2015 nos ta mira un bon colaboracion entre fundacion Centro di Pesca Hadicurari, Santa Rosa, Aruba Marine Park y Aruba Reef Care, cual hunto ta trahando aworaki pa otro torneo di Lionfish”, sr. Rosa a bisa.
Acogida ta grandi
Di su banda, sr. Castro Perez kende ta presidente di Aruba Reef Care y Secretario y vice presidente di fundacion Aruba Marine Park a bisa cu e tres fundacion menciona a haci manera un “joint-venture”, caminda Centro di Pesca Hadicurari a contribui cu nan grandemente hunto cu Santa Rosa pa realisa a Campeonato Nacional di Lionfish pa continua cu e campaña di conscientisa y purba di mengua e poblacion di Lionfish.
El a laga sa cu tur isla di Caribe ta trahando duro pa conscientisa y purba di diferente forma creativo pa tira of pisca e Lionfish.
E intencion di e campeonato aki ta esun di sigui promove esfuerso pa controla e poblacion di Lionfish invasivo rond di nos isla.
E acogida pa participa ta grandi, ya cu tur e sambuyado y piscado a cuminsa registra caba, ya cu e ta cay na liña tambe y e ta presente casi tur caminda rond di nos isla. Sr. Perez a bisa cu e premionan ta hopi atractivo, ya cu Centro di Pesca Hadicurari a pone casi 5 mil florin disponibel na premio pa stimula piscamento di Lionfish.
E persona cu ta participa individualmente por trece pisca y tur lo conta den forma acumulativo pa e premiacion. Prome luga lo ricibi 750 florin cash, sigui pa 500 y 250 florin pa di dos y tres luga. Ademas ehemplar mas grandi y mas chikito, lo keda premia pa 250 florin cada uno. Pa e dama cu mas kilo tambe lo tin un premio di 250 florin.
Dia 22 di november lo tin un evento di un solo dia pa ekipo. Aki e prome premio lo ta 1000 florin pa e team cu mas kilo, sigui pa 750 y 500 florin pa dos y tercer luga. Lo tin un premio 250 florin tambe pa e Lionfish mas grandi y mas chikito.
