(CNET) – ChatGPT ta un chatbot pa tur proposito, sinembargo su creador awo ta lagabo crea variacionnan pa un proposito specifico. Tambe, e modelo actualisa GPT-4 Turbo a yega.
OpenAI, e compania ken su ChatGPT a trece chatbot di AI na poblacion general, a bisa dialuna cu lo permiti bo crea aplicacionnan di inteligencia artificial cu proposito specifico usando su tecnologia. Y cu e App Store nobo binidero e lo lagabo haya y comparti e GPT’s nan aki, cual e compania ta yama hermentnan di inteligencia artificial personalisa, OpenAI ta spera di por haci su debut riba iPhone.
Bo no mester sa con pa programa pa por traha un GPT nobo. Bo por duna esaki instruccionnan den idiomanan normal, upload bo mesun conocemento den forma di un PDF, video of otro filenan y despues hiba e bot su proposito den e direccion cu bo kier manera crea imagen of ehecuta buskedanan riba internet.
“GPT ta un version personalisa di ChatGPT pa un proposito specifico,” OpenAI su hefe ehecutivo Sam Altman a bisa durante OpenAI su DevDay na San Francisco. El a demostra e tecnologia, bisando e sistema pa crea un aplicacion cu ta duna conseho pa companianan nobo cu ta usa informacion for di videonan cu e mes a yega di publica. Y e ta premira cu lo tin hopi mas GPT den futuro.
“Eventualmente bo lo tin GPT’s cu ta personalisa y por haci uso di varios otro GPT,” Altman a informa. “Bo lo por logra cosnan sumamente compleho pa medio di trece diferente servicio hunto.” Tambe na su DevDay, OpenAI a papia di un modelo di lenguahe grandi nobo yama GPT-4 Turbo cu por lidia cu instruccionnan hopi mas grandi y mas compleho.
OpenAI ta na e bispo di revolucion di inteligencia artificial, cu training pa su modelo di lenguahe enormemente compleho pa reconoce gran cantidad di texto manera forum di chat riba internet. E tecnologia por procesa instruccionnan manera “splica e concepto di inferno den Dante’s Inferno” y genera su propio respuesta. E compania tambe ta ofrece AI generativo cu por crea imagennan via su tecnologia Dall-E.
