(AP)—E economia global a resisti e golpinan di conflicto y inflacion aña pasa y ta anticipa pa crece na un nivel modesto di 2.8% den 2025, segun e Organisacion di Nacionnan Uni a bisa ayera.
Den e rapport “World Economic Situation and Prospects 2025”, economistanan di ONU a skirbi cu nan pronostico positivo ta stimula pa e crecemento fuerte pero lento pronostica pa China y Merca y pa e prestacion robusto anticipa pa India y Indonesia. Union Europeo, Hapon, Reino Uni ta anticipa di experencia recuperacion modesto, e rapport a bisa.
“Nos ta den un periodo di crecemento stabiel,” segun Shantanu Mukherjee, hefe di e Global Economic Monitoring Branch na e Economic Analysis and Policy Division di e Department of Economic and Social Affairs di ONU. “Esaki por zona un tiki manera loke a bisa aña pasa, pero en realidad si bo tira un bista mas profundo bo ta mira cu cos ta funcionando,” el a bisa.
E rapport ta bisa cu e economia di Merca a surpasa expectativa aña pasa danki na consumidornan y gastamento den e sector publico, pero ta anticipa pa e crecemento bira mas lento for di 2.8% pa 1.9% e aña aki.
E rapport a nota cu China ta mira su mesun crecemento fuerte birando mas lento for di 4.9% na 2024 pa 4.8% pa 2025 debi na menos consumi y debilidad den e sector di propiedad cu no ta logrando pa yena e buraco laga pa inversion publico y forsa di exportacion. Esaki ta forsando e gobierno pa implementa politicanan pa asina relaha mercadonan di propiedad, combati debe di gobierno local y stimula demanda.
China su poblacion cu ta birando mas chikito y e aumento den tensionnan di comercio y tecnologia por minimisa prospectonan di crecemento pa medio termino si esaki no ser atendi,” e rapport ta bisa.
ONU a pronostica na januari aña pasa cu e crecemento economico global di 2024 lo ta 2.4%. el a bisa ayera cu e grado a ser calcula pa ta mas halto, na 2.8%. Ambos ta keda bao di e grado di 3% cu mundo a mira prome cu e pandemia di COVID-19.
Ta pronostica cu crecemento Europeo e aña aki lo aumenta gradualmente despues di un prestacion mas abao na 2024. Hapon ta para pa yena e buraconan laga for di e periodonan di recesion. Ta anticipa tambe cu India lo stimula un prestacion fuerte pa Sur Asia, cu crecemento regional pronostica na 5.7% pa 2025 y 6% pa 2026.
India su crecemento di 6.6% pa 2025 ta evidente mirando e consumo priva solido y crecemento den inversion, e rapport ta bisa. “E reduccion global di pobresa durante e ultimo 30 añanan a ser stimula pa prestacion economico fuerte. Esaki ta specialmente berdad den Asia, unda crecemento economico rapido y transformacion structural a permiti paisnan manera China, India y Indonesia pa logra alivio di pobresa den un scala sin precedencia,” e rapport a bisa.
“En general, economia mundial a scapa un contraccion amplio a pesar di e sorpresanan di e ultimo añanan y e periodo mas prolonga di dificultadnan monetario den historia,” segun Li Junhua, director di e Economic Analysis and Policy Division na e Department of Economic and Social Affairs.
Sinembargo, el a adverti, “e recuperacion ta keda stimula principalmente pa un par economia grandi.”
