(AP) — Conseho di Seguridad di ONU ayera a exigi pa stop e atakenan escalando entre militantenan Libanes, Hezbollah y forsanan Israeli, advertiendo cu mas escalacion “tin riesgo di conduci na un conflicto amplio.”
Israel, y Hezbollah cu sosten di Iran, a hala atras despues di un intercambio di candela pisa a traves di e frontera delinea pa ONU entre Libanon y Israel durante weekend. Pero nan conflicto, decadas bieu, ta leu di caba y tension regional vincula na e guera na Gaza ainda ta halto.
E exigencia di Conseho di Seguridad pa Israel y Hezbollah stop hostilidad – cual no ta legalmente obligatorio – a yega den un resolucion prepara pa Francia, aproba unanimamente pa su 15 miembro, urgiendo e “actornan relevante” pa restaura “trankilidad, restriccion y stabilidad.”
“E riesgo di guera abierto ta keda real, y nos ta mobilisa hunto cu nos partnernan regional y internacional pa evita conflagracion regional,” embahador interino di Francia na ONU, Nathalie Broadhurst a bisa prome cu e voto.
Embahador di Israel na ONU, Danny Danon a bisa reporteronan cu e tabatin un mensahe pa pueblo Libanes: “Boso y boso gobierno tin un escogencia pa haci, confronta Hezbollah awe of mira mientras ta hundi boso pais den caos y destruccion.”
Representante Libanes, Hadi Hachem tabata hopi mas diplomatico, gradiciendo e conseho despues di e voto pa su mensahe cla “na fabor di stabilidad y un alto-al-fuego.” Y el a urgi miembronan: “Ban vota hunto, no solamente pa caba cu escalacion,” pero pa “un paz husto y comprensivo.”
E resolucion a extende cu un aña mas e mandato di un forsa di paz di ONU na Libanon, conoci como UNIFIL, cu a ser crea pa supervisa e retiro di trupanan Israeli for di sur di Libanon despues di un invasion na 1978 y cu t’ey desde e tempo ey.
Conseho di Seguridad a expande e mision despues di un guera na 2006 entre Israel y Hezbollah pa asina e soldadnan di paz por keda desplega na e frontera Libanon-Israel pa yuda trupanan Libanes extende nan autoridad den sur di nan pais pa prome biaha den decadas. E resolucion ey tambe a haci un yamado pa un paro total di hostilidad entre Israel-Hezbollah, cu no a sucede.
Sostenedornan di Hezbollah na Libanon frecuentemente ta acusa e mision di ONU di colusion cu Israel, mientras Israel ta acusa e mision di paz di ignora e actividadnan militar di Hezbollah den sur di Libanon.
Durante e enfrentamento andando entre Hezbollah y forsanan Israeli den sur di Libanon, facilidadnan di UNIFIL of miembronan di e mision di paz a ser alcansa pa bom of tiramento na varios ocasion.
Danon a culpa Hezbollah pa lansa atakenan no-provoca contra Israel cuminsando e dia despues di e atakenan di Hamas dia 7 di october den sur di Israel, cu a inicia e guera na Gaza. Desde esey, el a bisa, mas cu 8mil raket, 300 drone explosivo y 1,500 misil anti-tank a ser lansa contra Israel, forsando mas di 60mil Israeli den nort pa bandona nan cas.
Danon a acusa Hezbollah di dispara for di sur di Libanon – dentro di area di operacion di UNIFIL – den violacion di e resolucion di alto-al-fuego di 2006 y a mustra e conseho potret cu el a bisa tabata cerca di algun di su facilidadnan.
El a bisa cu no ta bay tin stabilidad mientras ta ignora e “acumulacion militar masivo” di Hezbollah, el a bisa. Israel ta determina pa debolbe nan civilnan na nan hogar, y mientras ta faborece diplomacia, Danon a adverti cu “tempo ta cabando.” Si diplomacia fracasa, “nos ta bay usa tur medio necesario pa restaura trankilidad y stabilidad na nort di Israel,” el a bisa.
Aliado di Israel, Merca a sostene e derecho di Israel pa defende su mes di atakenan di Hezbollah. “Libanon no mester ta un refugio pa organisacionnan terorista ni un pad pa lansa atake contra Israel,” embahador interino di Merca, Robert Wood a bisa e conseho, bisando cu Iran ta violando e embargo riba arma den resolucion di 2006 door di provee Hezbollah cu mayoria di arma cu ta lansa contra Israel.
