(AP)—E Organisacion di Nacionnan Uni (ONU) y otro organisacionnan internacional ta preparando pa cuatro aña mas di Donald Trump. Den su prome termino, Trump a suspende fondo pa e agencianan di ONU riba planificacion di famia y salud, a retira for di e organisacion cultural y e organismo mas halto di derecho humano, y a aumenta tarifa riba China y hasta aliadonan di Merca por medio di e gaba e buki di regla di e Organisacion Mundial di Comercio. Merca ta e donante mas grandi pa ONU, pagando 22 porciento di su presupuesto regular.
Aki ta sigui un bista di kico Trump 2.0 por nifica pa organisacionnan global:
“Un teatro” pa agenda conservativo
Speculacion tocante e politicanan di Trump den futuro ya a bira un wega na Washington y mas aya, y pa lesa e señalnan riba asuntonan importante pa ONU no semper ta facil.
Por ehempel, Trump a yama cambio di clima un estafa y a mustra sosten pa e industria di combustible fossiel pero a bira amigo cu supuesto ambientista Elon Musk. Su prome administracion a funda esfuersonan pa haya un vacuna contra Covid-19, pero el a alinea cu activista anti-vacuna Robert F. Kennedy Jr.
Richard Gowan, director di ONU pa e think tank International Crisis Group, ta anticipa cu Trump no lo considera e organismo mundial “como un luga pa tramita negociacion politico serio pero lo explot’e como un teatro pa persigui un agenda conservativo globalmente.”
Tin algun pista for di su prome termino. Trump a saca Merca for di e acuerdo di Paris riba clima y lo probablemente haci’e atrobe despues cu presidente Joe Biden a uni aden atrobe. Trump tambe a saca Merca for di UNESCO y e Conseho di Derecho Humano di ONU, bisando cu nan tabata contra Israel. Biden a drenta back den tur dos den su termino.
Trump a recorta fondo pa e agencia di poblacion di ONU pa servicionan di salud reproductivo, bisando cu esaki tabata fundando abortus. UNFPA ta bisa cu e no ta tuma un posicion riba derechonan di abortus, y cu Merca a uni cune atrobe.
Un mundo di ‘Guera Friu’ nobo?
Mundo ta un diferente luga ora Trump a grita “America Prome” mientras el a tuma oficina na 2017: Gueranan a plama den e Medio Oriente, Ucrania y Sudan. E arsenal nuclear di Nort Korea a crece, y tin hopi preocupacion tocante e programa atomico di Iran.
E Conseho di Seguridad di ONU—mas dividi entre su miembronan permanente Britania, China, Francia, Rusia y Merca—no a haci ningun progreso pa resolve e asuntonan ey. Respet pa ley internacional den zonanan di guera mundialmente no ta ser cumpli.
“Ta echt sinti pa e dianan di Guera Friu,” segun John Bolton, ex-consehero di seguridad nacional na e White House durante Trump su administracion. El a bisa cu Rusia y China ta “protegiendo” Iran, cual a causa instabilidad den e Medio Oriente, y Nort Korea, cual a yuda Rusia den su guera na Ucrania. Tin tiki chens di yega na acuerdonan riba e proliferacion di armanan of resolve conflictonan envolviendo Rusia of China den e conseho, el a bisa.
Posible efecto riba trabao di ONU
E trabao diario di asistencia tambe ta enfrenta incertidumbre. Na Geneva, unda tin hopi organisacion di ONU ubica cu ta enfoca riba asuntonan manera derecho humano, migracion, telecomunicacion y clima, algun diplomaat ta bisa cu Trump en general a mantene su fondo di ayudo humanitario durante su prome termino.
Comercio tabata algo diferente. Trump a surpasa e reglanan di OMC, imponiendo tarifa riba hero y otro productonan for di ambos aliado- y rivalnan. Cumpliendo riba su menasanan nobo, manera imponiendo 60 porciento di tarifa riba productonan for di China, por sacudi comercio global.
Allison Chatrchyan, director di e AI-Climate Institute na Cornell University, a bisa cu progreso global den adresa cambio di clima “ta bayendo lento” danki na e acuerdo di Paris y e convencion di ONU riba cambio di clima, pero e eleccion di Trump “lo sigur crea un ola sonico den e sistema.”
“Ta hopi probable cu presidente Trump lo atrobe saca Merca for di e acuerdo—pero bao reglanan nobo di e trato, esaki por solamente tuma efecto despues di cuatro aña,” segun Chatrchyan, ken lo asisti na e cumbre climatico COP29. “Liderazgo Mericano, cual ta crucial, lo disparce.”
Durante COVID-19, ora miyones di hende globalmente tabata birando malo y muriendo, Trump a critica e Organisacion Mundial di Salud y a suspende fondo. Si Merca sali for di OMS, esaki lo causa “un desaster”—por medio di kita e agencia di ambos su fondo y experticio tecnico.
