(AP)—E crisis humanitario na Sudan ta na un “punto critico” en medio di bringamento y inundacionnan devastador, segun e agencia di migracion di ONU a bisa ayera, prome cu e discusionnan di paz plania mas despues den siman.
E discusionnan ta enfrenta inciertud como cu e ehercito Sudanes no a confirma ainda su participacion den e reunion na Suisa media pa Merca y Saudi Arabia.
E nacion Africano a cay den caos na april aña pasa ora tensionnan entre e ehercito y e grupo paramilitar, e Rapid Support Forces, a cuminsa bringa den e capital, Khartoum, prome cu esaki a plama den e pais. E region este di Darfur a mira algun di e peleanan mas devastador.
E conflicto a mata miles di hende y a pusha hopi pa hamber. Su atrocidadnan ta inclui abuso sexual en masse y asesinatonan etnicamente motiva cu ta conta pa crimennan di guera y crimennan contra humanidad, segun ONU y gruponan di derecho internacional.
E guera na Sudan a crea e crisis di desplasamento mas grandi na mundo. Mas cu 10.7 miyon hende a ser forsa pa huy for di nan cas desde bringamento a cuminsa, segun e Organisacion Internacional pa Migracion. Mas cu 2 miyon di esnan cu a huy a bay na paisnan den bisindario.
Inundacionnan devastador den e ultimo simannan a empeora e tragedia. Decenas di hende a muri y infrastructura critico a ser afecta den 11 di e 18 provincia Sudanes, segun autoridadnan local.
“Nos a yega na un punto critico, un punto catastrofico y cataclismico,” segun Othman Belbeisi, e director regional di IOM.
E condicionnan lo empeora si e guera y restriccionnan riba acceso humanitario continua, Belbeisi a adverti: “Sin un respuesta global cu ta inmediato, masivo y coordina, nos ta riesga para testigo na dies miles di mortonan prevenible den e proximo lunanan.”
Luna pasa, expertonan global a confirma cu hamber na un campo masivo pa hende desplasa na Darfur a crece den hambruna. Y aproximadamente 25.6 miyon hende—mas cu mita di e poblacion Sudan—lo enfrenta hamber emergente, manera e expertonan di e Comite di Evaluacion di Hambruna a adverti.
Bringamento ainda ta andando den e capital di Darfur, al-Fasher, y e provincia sureste Sennar, unda conflicto a forsa mas cu 700,000 hende pa huy luna pasa, segun IOM. E ehercito ainda no a confirma si e lo presenta na un ronda nobo di discusionnan pa un alto el fuego cu ta plania pa mayan na Suisa, e envio special di Merca pa Sudan, Tom Perriello, a conta reporteronan ayera na Geneva. RSF a bisa cu e lo presenta.
Un delegacion di gobierno Sudanes a reunion durante weekend cu oficialnan Mericano den e ciudad costero na Saudi Arabia pa purba garantisa e presencia di e ehercito mayan, pero no a logra ainda.
“Nos tin un comunicacion extensivo cu SAF,” Perriello a bisa di e Forsanan Arma Sudanes, “pero nan no a duna nos un afirmacion ainda, cual lo ta necesario awe pa sigui dilanti.”
ONU, e Union Africano, Egitpo y e Emiratos Arabes Unidos—cual a ser acusa di sostene e RSF cu arma, un declaracion cu oficialnan di EAU a nenga—ta anticipa di atende na e discusionnan como observadornan.
