(EFE) – Oficina di ONU pa Derechonan Humano na Honduras, a presenta ayera diamars su rapport anual den cual ta trece dilanti, un biaha mas, e violencia persistente y un aumento di atakenan contra defensornan di derechonan humano y periodistanan maske tin un estado di excepcion implementa cu a laga 24.563 detencion.

Den sentido aki, e rapport anual di Oficina di Alto Comisionado di ONU pa Derechonan Humano (OACNUDH) ta señala cu violencia y insiguridad “ta continua afectando” Honduras.

Honduras na 2023 a registra un reduccion di 17% den number di homicidio, pero a aumenta un 24,2% e morto violento di hende muhe, segun datonan di OACNUDH.

E representante di OACNUDH na Honduras, Isabel Albaladejo, a bisa EFE cu na e pais problemanan structural, manera violencia, impunidad y falta di acceso pa husticia, ademas di e violacion di derechonan humano, “ta persisti.”

“Ta problemanan structural cu ta bin for di añanan caba y cu no por papia di dje den corto tempo, for di impunidad, falta di acceso pa husticia, violencia specialmente contra hende muhe, tambe un modelo di desaroyo cu a privilegia poco sector deteriorando mayoria di e poblacion.”

No obstante, el a destaca “avancenan chikito” na Honduras pa papia di e problemanan aki for di sociedad civil, asina como tambe “e boluntad” di Gobierno.

Ademas, Oficina di ONU a señala cu Honduras na 2023 a reporta “un aumento considerable” den atakenan contra defensornan di derechonan humano, principalmente, esnan cu ta defende nan tera, teritorio y medio ambiente, ademas di periodistanan “sin cu a duna un contesta efectivo di estado pa e situacion di riesgo cu e personanan aki ta enfrenta.”

“Ta preocupa e falta di respuesta efectivo di Sistema Nacional di Proteccion principalmente e falta di implementacion oportuno y eficaz di medidanan di proteccion,” e rapport ta señala.

Aña pasa, OACNUDH a registra 363 atake contra 453 persona, di nan 308 ta defensornan di derechonan humano y 145 periodista, cu a caba den asesinato di 15 defensor y dos comunicador.

Albadalejo ademas a expresa su preocupacion pa “independencia y imparcialidad” di Poder Hudicial y e duracion prolonga di estado di excepcion, cu ta implementa for di december 2022, “sin cu a hustifica su necesidad, proporcionalidad y sin cu ta existi control hudicial adecua.”

Segun cifranan oficial, den marco di estado di excepcion Polis Nacional a realisa cerca di 24.563 detencion, entre nan 1.581 ta hende muhe y 322 ta menor di edad, mas 16.988 entrada hudicial.

Albadalejo a pidi na Honduras promove un modelo di desaroyo “inclusivo y igualitario” y tambe pa adopta marconan legal y practicanan institucional pa “disminui” violencia y impunidad.

Minister Hondureño di Presidencia, Rodolfo Pastor, a indica na prensa cu e rapport di OACNUDH ta refleha “e realidad tragico” cu Honduras ta enfrenta pa garantisa derechonan humano na su habitantenan.