Presidente di Colombia Juan Manuel Santos a informa cu tin  mas di 50.000 arma di candela,  cu a ser confisca o duna voluntariamente di banda di gueriya. Cu e afirmacion aki Presidente Santos ta contradeci e critica di oposicion, caminda nan ta bisa cu e grupo di gueriya no a entrega tur arma den e proceso di desarme.

E presidente a splica cu den e ultimo añanan autoridadnan di Colombia a decomisa 13.467 arma for di FARC, gueriyeronan cu a sali for di e grupo revolucionario a duna cerca di 3700 arma. Gobierno tabatin un registro di 25 mil arma prome cu aña 2010. E proceso di paz a aumenta e cantidad di arma te 7.132, hunto cu 800 arma mas cu gueriyeronan tin ainda pa garantisa seguridad na e zonanan veredal. E total ta cerca di 50 mil arma cu ta conta caba, Santos a splica.

Santos a papia tocante un comunicado cu  a sali for di ministerio di defensa, caminda nan a papia di un inventario di 14 mil arma y cu FARC a duna 7132, solamente. Santos a manifesta cu tabata un kibocacion di nan y  cu a ser coregi despues. Presidente a splica cu informacion asina ta e sorto di argumento cu “oposicion ta usa pa califica e proceso di paz como negativo. Na algun momento ministerio di defensa a papia di 14 mil arma, pero despues oposicion a usa e informacion na su conveniencia.”

Santos a informa tocante e posibilidad di participacion politico di FARC, despues cu nan por logra  desmobilisa totalmente como forsa arma revolucionario.

“Mi ta spera cu FARC lo participa den politica, y cu nan por planea bon nan idea y vision di e pais manera cualkier partido politico mester haci, esey ta e importancia di e proceso aki. Nan mester laga nan arma, laga violencia un banda y despues nan lo cuminsa papia liber na henter pais, pero cu palabra”.

Santos a splica cu e nunca  a apoya e grupo gueriyero aki. “Mi ta anticomunista, mi no ta kere den marxismo leninismo, pero na momento manera awor mi lo haci tur cos posibel pa garantisa na FARC nan derecho di liber expresion, esey ta democracia, esey ta libertad.”

Tocante propiedad di FARC, Santos a bisa cu nan mester duna tur nan cos y propiedad, pasobra si nan no ta cumpli, nan lo perde nan beneficionan.  Propiedadnan di FARC cu nan no duna voluntariamente na gobierno, lo keda confisca. ONU a recupera 77 lancha  y nan ta spera pa culmina cu proceso prome cu dia 1 di Augustus.

Santos a papia tambe tocante su popularidad entre Colombianonan, pasobra apesar cu el a logra e acuerdo di paz,  su popularidad ta hopi abao. E presidente a bisa cu e tabata sa cu su dialogo cu FARC no tabata un decision cu lo faborece den campo politico.

“Hende no lo comprende cu despues cu mi tabatin exito den combati FARC, anto mi por sinta cu e enemigo pa asina dialoga pa haya paz. Mi tabata sa cu e proceso di paz lo tin un costo politico halto,” Santos a conclui.