Agencia nuclear di Nacionnan Uni a bisa ayera cu nivelnan levemente eleva di radioactividad detecta na nort Europa probablemente tabata relaciona na un reactor nuclear cu sea tabata operando of ricibiendo mantencion, pero ainda no ta cla unda e ta localisa.
Estonia, Finlandia y Suecia siman pasa a midi nivelnan mas halto cu usual di isotopo ruthenium y caesium y a detecta otro radionuclide artificial. Nan a bisa cu nada den nan teritorio a pasa pa splica nan presencia, igual na 40 otro pais cu a provee informacion boluntariamente na e Agencia Internacional di Energia Atomico.
IAEA a bisa cu e nivelnan eleva di isotope ‘probablemente ta vincula na un reactor nuclear cu sea ta operando of ricibiendo mantencion, momento den cual por tuma luga liberacion radioactivo hopi abou’. A agrega den un declaracion cu ‘e origen geografico di e liberacion ainda no ta determina’.
E agencia di ONU basa na Vienna a bisa cu a ‘descarta cu e liberacion tabata relaciona na maneho inapropia di un fuente radioactivo’. “Tambe ta poco probabel cu ta vincula na un planta di procesamento di combustibel nuclear, un pool di combustibel gasta, of e uso di radiacion den industria of medicina”, a bisa. E agencia a insisti un biaha mas cu e concentracion di particula den aire tabata hopi abou y no ta representa un riesgo pa salud humano of medio ambiente.
Instituto Nacional pa Salud Publico y Medio Ambiente Hulandes a bisa siman pasa cu e isotope por ta di un fuente na Rusia, y ‘por indica daño na un elemento di combustibel den un planta nuclear’. Operador estatal di energia nuclear Ruso, sinembargo, a bisa cu e dos plantanan nuclear den Rusia nort occidental no a reporta ningun problema.
Rusia tabata entre e paisnan cu a reporta na IAEA despues cu a tuma contacto cu autoridadnan nuclear na Europa pa solicita informacion.
